Panagkaykaysa dagiti umili iti Ilocos Sur tapno agari ti kappia, nakiddaw

VIGAN CITY — Pannakikaysa ken panangsuporta dagiti pribado nga umili ken dagiti nabutosan nga opisial kadagiti tropa ti gobierno tapno magibusanen ti insurhensia ken agari ti agari ti mataginayon a kappia iti sibubukel a probinsia ti Ilocos Sur.

Dayta ti nagkaykaysa a nakiddaw ken tarigagay dagiti nagatender iti taripnong ti Provincial Task Force in Ending Local Communist Armed Conflict (PTF ELCAC) sadiay Provincial Capitol, Vigan City idi Agosto 14, 2020.

Indauluan da Governor Ryan Luis Singson ken Vice Gov. Jeremias Singson ti taripnong, Philippine Army 702nd Infantry Brigade Commander Brig. Gen. Audrey Pasia, Ilocos Sur Police Provincial Provincial Director Colonel Ronald Tagao, Department of Interior and Local Government Ilocos Sur Provincial Director Reggie Colisao ken dadduma pay nga opisial ti gobierno pakaibilangan dagiti mayor iti Ilocos Sur.

Natratar iti taripnong ti kasasaad ti kappia ken talna iti probinsia agraman dagiti napasamak nga enkuentro iti probinsia iti nagbaetan dagiti tropa ti gobierno ken dagiti rebelde a komunista. Nataming pay ti pannakaisayangkat ken pannakapasayaat dagiti gannuat ti gobierno tapno magibusanen ti problema ti insurhensia.

Inrakurak dagiti mangidaulo ken pannakabagi dagiti nagduduma nga ahensia ti National Government dagiti programada a mangtulong kadagiti sumuko a rebelde. Impakaammo ti DILG, Department of Trade and Industry, Technical Education and Skills Development Authority, Department of Labor and Employment ken Department of Education dagiti programa ken serbisioda a mangtulong kadagiti rebelde nga agsubli iti salinong ti linteg tapno mangabaruananda iti biag.

Pinasingkedan ni Gov. Singson ti naan-anay a suportana iti Philippine Army ken Philippine National Police iti pannakagibusen ti insurhensia iti probinsia tapno magun-od ti naan-anay a kappia ken panagdur-as. Kiniddawna kadagiti umili nangruna kadagiti opisial dagiti barangay ken lokal a gobierno ti panangsuportada kadagiti programa ken gannuat tapno manggibusen ti insurhensia.

Naangay ti taripnong ti PTF – ELCAC. kalpasan ti sumagmamano nga aldaw a napasamak ti nadara nga enkuentro iti nagbaetan dagiti tropa ti Philippine Army ken rebelde a komunista sadiay Barangay Suagayan, Santa Lucia, Ilocos Sur idi Agosto 8 – 9, 2020.

Maibasar iti report, napapatay iti dayta nga enkuentro ti maysa a kameng ti Philippine Army, lima a miembro ti Kilusang Larangan Gerilya – Southern Ilocos Sur, ken maysa a sibilian a naipit iti crossfire.

Pimmusay iti dayta nga enkuentro ni Private First Class Wilfredo Doctor Jr., ti 91st Brigade Reconnaissance Company ti Philippine Army. Natay met dagiti rebelde a da Edgar Justo alias Ka Nardo, ti Bugnay, Candon City; Rolando Marvil alias Ka Eugene, ti Bugnay, Candon City; Rogelio Capulas alias Asyong ken Witiwit ti Sitio Linggawa, Barangay Pidpid, Sta. Cruz, Ilocos Sur; Pamela Peralta, alias Maymay, ti Baguio City; ken Marxes Dazon ti Kayan, Tadian, Mountain Province. Nairaman met a napapatay ni Diosdado Valdez, maysa a seaman ken agnegnegosio iti nateng a taga-Parioc 1st, Candon City. Naireport pay ti kaadda dagiti nasugatan a kameng ti militar, rebelde ken sibilian kabayatan ti napaut a ranget.

Iti bigat dayta nga aldaw a pannakaangay ti taripnong ti PTF – ELCAC, naireport ti pannakapasamak ti enkuentro iti nagbaetan dagiti tropa ti 81st Infantry Battalion sadiay Sitio Siblucan, San Emilio, Ilocos Sur, iti nagbednganda iti ili ti Gregorio del Pilar, ngem awan ti naipadamag a natay wenno nasugatan. Naireport met iti karabianna, ti pannakatiliw dagiti dua a lider dagiti rebelde sadiay Brgy. Damacuag, Sta. Lucia, Ilocos Sur. Mainaig iti pannakagun-od ti kappia ti Ilocos Sur, nagapila met dagiti papadi iti Arkidiosesis ti Nueva Segovia iti panangidaulo ni Arsobispo Marlo M. Peralta para ti sangsangkamaysa a panagkararag dagiti umili para ti panagari ti urnos ken talna iti intero a probinsia.