Latest News: Panagkaykaysa ken protesta, naipakita iti anibersario ti Martial Law | Tawid News Magazine - Weekly Ilocos News 📰

Panagkaykaysa ken protesta, naipakita iti anibersario ti Martial Law

BAGUIO CITY — Saan a nalappedan ti awan sarday a tudo ken lammin ti ginasut nga umili a nakipagpaset iti pananglagip iti maika-47 nga anibersario ti panakaiyetnag ti Martial Law iti daytoy a siudad idi Septiembre 20. Indauloan ti Cordillera Movement Against Tyranny (CMAT) ti panangisayangkat iti dua a kangrunaan nga aktibidad iti nasao nga aldaw.

Naisayangkat ti Human Rights Summit in the Cordillera sadiay UP Baguio Hymnasio Amianan a dinar-ayan iti nasurok 500 a katao manipud iti nadumaduma a probinsia ken organisasion.

Iti patangan nga impaay ni University of the Cordilleras President Dr. Ray Dean Salvosa, inyunay-unayna a rumbeng a kanayon a lagipen dagiti pasamak idi panawen iti diktadora ni dati a presidente Ferdinand Marcos.

“Saantay’ mabalin nga annugoten ti ibagbaga dagiti (pamilia) Marcos. Saantay’ rumbeng a lipaten. Ikedkeddeng ti pannakipaay ti hustisia ti intay’ pananglagip,” kinuna ni Salvosa.

Innayonna a ti Martial Law ket saan laeng a pasamak iti napalabas, no di ket agtaltalinaed daytoy a parikut iti agdama.

Maysa ni Salvosa kadagiti aktibista iti syudad a nakipagpaset iti makunkuna a First Quarter Storm. Daytoy ket serye ti dadakkel a protesta kontra iti administrasion ni Marcos nga indauloan dagiti agtutubo ken estudiante a nagrugi idi Enero inggana Marso ti 1970.

Iti met mensahe nga impatulod ni Senador Leila de Lima, dinayawna dagiti nangurnos iti aktibidad iti agtultuloy a panangitakder ken panangitandudoda iti karbengan dagiti umili.

“Iti naglabas a tallo a tawen, nagbalin a pagannurotan ti estado a trataren ti kalintegan ti tao kas peggad iti linak ken talna, ken dagiti mangitantandudo kas kalaban ti gobierno,” kinunana ni de Lima.

Innayonna a daytoy ti mangmangted ti pannakaallilaw ti adu nga umili iti husto a kaipapanan ti human rights.

“Ngem saantayo a sumuko gapu ta manipud mismo iti kameng dagiti ordinario nga umili a rumusing dagiti baro a henerasion a mangsalaknib iti kalintegan ti tao. Nalipatansan ni Duterte a naggapu iti kameng dagiti maririgat nga umili ti kakikiredan a bannuar ti pagilian,” kinunana pay.

Iti met keynote nga imbitla ti beterano a periodista ken maysa kadagiti mangidadaulo iti Movement Against Tyranny a ni Inday Espina-Varona, kinunana a ni Marcos ken Duterte ket awan nagdumaanda. Impalawagna a ni Marcos ket nagdeklara iti Martial Law tapno agbalin a diktador, bayat a ni Duterte ket agturturayen kas diktador iti likud ti ‘ar-arkus a demokrasia.’

Imbingayna nga agtawen isuna iti 22 idi ingibus ti People Power ti diktadora ni Marcos ket bayat iti panagbalinna a kameng ti media “in-cover ken sinuratko dagiti masaker idi, ket itatta a 47 ti tawenko adu latta ti maisursuratko a masaker.”

Kinarit ni Varona dagiti delegado iti napasamak a Human Rights Summit in the Cordillera nga agtalinaed a situtured a mangsalaknib iti kalintegan ti tao ken demokrasia.

“Dakami nga adda iti media ket natured, gapu ta natured dagiti umili a pagserserbianmi,” kinunana.

Panggep ti summit a buklen ti nalawlawa a panagkaykaysa kontra ti umir-irteng a pannakaabuso iti kalintegan ti tao ditoy rehion. Nairussuat ti aktibidad babaen ti panagtitinnulong ti Student Council ken All Workers Union ti University of the Philippines Baguio (UPB), Cordillera Human Rights Alliance, Cordilleran Youth Center ken ti CMAT.

Kalpasan ti summit, indauloan dagiti estudiante ken sumagmamano a manursuro ti UPB ti martsa a nagturong iti Igorot Park. Iti kinaadu dagiti nagmartsa, apagbiit a naiserra ti trapiko iti maysa a paset ti Session Road kasta met iti maysa a lane ti Harrison Road a batog ti Igorot Park.

Linaon dagiti plakard ken streamer dagiti nagprotesta ti panangkondenarda iti umad-adu a bilang dagiti biktima ti Oplan Tokhang ken ‘all-out war’ ti administrasion kontra kadagiti kritikona.●