Panagkaykaysa ti PNP ken Army

SAPAY koma ta saan nga agparnuay iti nakaro a susik iti nagbaetan ti Philippine National Police ken Philippine Army ti kontrobersial a pannakapapatay dagiti uppat a soldado sadiay Jolo, Sulu ta maapektaran la ketdi ti kampania ti gobierno kontra kadagiti terorista ken kabusor ti estado ti Pilipinas nangruna sadiay Mindanao a pakapaspasamakan dagiti adu a riribuk.

Nalatak ti Jolo, Sulu iti adun a dekada a pakapaspasamakan dagiti nadara a pammapatay ken panagraranget iti nagbaetan dagiti tropa ti gobierno kontra kadagiti rebelde, bandido ken terorista. Ngem naisangsangayan ti kaudian a “shooting incident” wenno pammaltog a napasamak iti sentro ti Jolo idi malem ti Hunio 29, 2020. Napapatay iti dayta nga insidente dagiti dua a commissioned officers ken dua nga enlisted personnel ti Philippine Army, ket dagiti nakapatay ket kameng ti Philippine National Police.

 Nakalkaldaang ken nakasaysayang ti nakettel a biag da Major Marvin Indammog, Commanding Officer ti 9th Intelligence Security Unit; Captain Irwin Managuelod, Field Service Intelligence Commander; Sergeant. Eric Velasco ken Corporal Abdal Asula ta kabayatan ti panangakemda kadagiti annongenda a mangsursurot kadagiti masuspetsa a suicide bombers ket napapatay ida dagiti siam a kameng ti Jolo Police Station, imbes a dagiti sursurotenda a terorista.

Maibasar iti report, dagiti uppat a napapatay a nakadestino iti Intelligence Unit ket madamada a sursuroten dagiti masuspetsa a bomb makers ken suicide bombers sakbay ti pannakapasamak ti pannakapapatayda iti ima dagiti polis.

Nagduma dagiti bersion dagiti Army ken PNP mainaig kadagiti pasamak iti pannakapapatay dagiti uppat a soldado.

Segun iti pakauna a report ti Western Mindanao Command, dagiti uppat a napapatay ket addada iti mission kontra kadagiti suicide bombers a kakumplot ti Abu Sayyaf Group iti las-ud ti Barangay Mauboh, Patikul, Sulu. Nakaluganda iti Mitsubishi Montero SUV a nakaparking iti asideg ti police vehicle idi paputokan ida dagiti polis.

Maibasar pay iti nayon nga Army report, ti grupo dagiti intelligence operatives ket mangisaysayangkat iti operasion sadiay Brgy. Mauboh, Patikul, ken pimmanawdan iti 2:15 iti malem. Nasaksian ti nakamotorsiklo a kameng ti Intelligence Team a mangsursurot iti SUV a pinara ida dagiti polis iti checkpoint iti panagturongda sadiay Jolo, ken napalubosanda a lumasat kalpasan a nagtutulagda nga agsasaritada iti police station. Nagturong ti SUV iti police station ken nagparking iti agarup 50 metro ti kaadayona. Simmurot met ti police vehicle iti SUV ket nagparada iti asidegna, kalpasanna, napasamaken ti pammaltog,

Segun met iti report ti Sulu Police Provincial Office para ti Police Regional Office – Bangsamoro Autonomous Region, dagiti kameng ti Jolo Municipal Police Station ken Police Drug Enforcement Unit ket agpatpatruliada sadiay Barangay Bus-bus idi sitarenda dagiti uppat nga armado a sibilian a nakalugan iti grey Mitsubishi Montero SUV, ket inturongda sadiay Jolo Police Station. Dagiti nakalugan iti SUV ket pinatarayda ti luganda ket ginandatda ti naglibas, isu a kinamat dagiti polis, ket idi napasardeng ti SUV, ginandat dagiti nakalugan ti aglibas ket inruarda dagiti armasda ket nangrugin ti pinnaltog.

Gapu iti nagsupadi a bersion ti Army ken PNP, ket nakiddaw ti panagimbestigaren ti National Bureau of Investigation tapno maparuar ti kinapudno ken maikkan ti hustisia dagiti napapatay nga uppat a soldado babaen ti pannakaipaay iti tumutop a dusa kadagiti nagbasol.

Immuna nga inrakurak ni PNP Spokesman Brig. Gen. Bernard Banac a missencounter ti napasamak ta saan a nabigbig dagiti polis dagiti military. Ngem kalpasan dagiti sumagmamano nga aldaw a panagimbestigar ti NBI ken nabuya dagiti CCTV video footages nga awan ti pakakitaan a ginandat ti limmaban dagiti uppat a military ket impalgak ti PNP Spokesman a “shooting incident” ti napasamak.

Marurod ni Army Commanding General Lt. Gen. Gilbert Gapay iti awan-mamaay a pannakapapatay dagiti uppat a babaenna ta awan ti rason tapno lak-amenda iti pannakakettel ti biagda iti ima dagiti kameng ti PNP a kaduada koma a mangaywan iti seguridad iti Sulu. Ibilangna a “rubout” ti napasamak, ket adda gandat a mangiyaw-awam iti pudno a pagteng ta adda nai-upload iti social media iti ipapan dagiti Army personnel iti crime scene ket naala ti pananggaraw ti nakasibilian a nagreponde iti ulo ti maysa kadagiti bangkay ken pananglukatna iti ridaw ti driver’s side ti SUV. Nairakurak a ti naala iti video ket maysa met laeng a kameng ti Army a kabsat ti napapatay a soldado.

Agriri dagiti opisial ti Army iti pannaka-upload ti video kabayatan a mapukpukaw dagiti CCTV footages kabayatan ti kanito a pannakapasamak ti shooting incident a napateg unay a pagbasaran iti pudno a napasamak.

Nagballaag dagiti opisial ti PNP sadiay Bangsamoro Autonomous Region a kasuanda dagiti soldado a nakibiang iti crime scene ta inurayda koma dagiti kameng ti PNP Scene of the Crime Operatives a nagimbestigar. Ngem apay a dagiti laeng soldado a nakibiang iti crime scene dagiti makasuan? Ania ti inaramid dagiti kameng ti Jolo Police Station ta pinanawanda imbes a binantayanda ti crime scene tapno masaluadan dagiti ebidensia? Nagbutengda ngata kadagiti simmangpet a tropa ti Army ta amangan no balsenda ida?

Impeksa ni Interior and Local Government Secretary Eduardo Año ti pannakipagladingitna iti pamilia dagiti pimmusay nga uppat a soldado. Impalgakna a personal nga am-ammona dagiti dadduma a natay kas sigud nga opisial ti Philippine Army a nadestino sadiay Mindanao ken Chief of Staff ti Armed Forces of the Philippines. Impatalgedna a maipaayanda iti hustisia dagiti napapatay a soldado.

 Uray ni PNP Chief General Archie Gamboa, impasingkedna met ti suportana iti patas a pannakaimbestigar iti kaso tapno maipaayan ti hustisia dagiti napapatay a kameng ti AFP.

Para iti sigud nga AFP Chief of Staff ken agdama a PNP Chief, maldaanganda unay ta dagiti napapatay nga opisial ket kalaksidan a padada a nagturpos iti Philippine Military Academy, ket ammoda ti rigat ken sakit ti nakem a laklak-amen ti pamilia dagiti pimmusay a saanda nga impagarup a kaduada iti gobierno ti mangkettel ti biagda.

Nakalkaldaang ti pannakapapatay dagiti uppat a soldado iti ima dagiti polis ta uray sinonto dagiti maduktalan a nagbasol ket dakkel a pukaw ti gobierno ken dagiti umili.

Sapay koma ta saanen a marubroban ti pungtot dagiti pamilia ken kasinged dagiti nagbalin a biktima. Mapasamak laeng dayta no saan a mayaw-awan ti imbestigasion ti NBI, ken maidarum ken madusa dagiti mapaneknekan a nagbasol.