Panagkunniber, korapsion, peste ti pagilian

Iti maysa a naiwayat a surbey, limtuad a dakkel ti mapukpukaw ti gobierno iti panagkunniber ken korapsion.

Dagiti kangrunaan nga ahensia a nadakamat a nakaro pakapaspasamakan ti panagkunniber ti Bureau of Internal Revenue, Bureau of Customs, Department of Public Works and Highways, Department of Education ken uray iti Department of Health.

Pammaneknek ti kaadda ti panagkunniber ken kurapsion dagiti kalsada a no ar-arigen ket kakonkongkreto wenno kaas-aspalto pay laeng ngem mabalinen a pagsungkaan, dagiti libro a nagdaras a mapirpir ken masayyasayya dagiti pinanidda, dagiti pagtugawan a nagdaras a maluspigo, dagiti medisina a magatang kadagiti ospital a nanginngina ti presioda ngem dagiti magatang kadagiti pribado a parmasiutika, dagiti bassit-usit nga idekdeklara dagiti dadakkel a kompania a napastrekda a saan a masitsita gapu iti pannakikumplot dagiti nangangato a turayen, dagiti maipuslit iti customs a produkto ken pannakapalubosda nga agbayad iti nababbaba a buis babaen ti “tulong” dagiti dadakkel a tao.

Adu dagiti pammaneknek iti korapsion ngem kaadduan a dagiti laeng babassit nga ikan ti maikursong iti pagbaludan no adda lumtuad a dakkel nga eskandalo a pakaisawsawan dagiti dadakkel nga ikan.

Madakamattayo ditoy ti fertilizer scam a nakaisangkotan ti maysa a nangato nga opisial ti Department of Agriculture.

Dakkel nga isyo daytoy iti napalabas gapu iti alegasion a naaramat ti minilion a pondo iti eleksion idi 2004.

Idi nakaro unayen ti pudot a pinarnuay ti nasao nga eskandalo, nagpukaw ti kangrunaan a maitudo nga adda pakainaiganna iti daytoy. Naammuan laengen a natiliw iti Estados Unidos gapu iti pannakawaswas ti pasaportena.

Mano a tawen a rinupakna ti pannakaipalladawna ditoy pagilian tapno sanguenna ti kaso a maikontra kenkuana. Babaen ti extradition treaty iti nagbaetan ti Estados Unidos ken iti Pilipinas, napagawid daytoy nga opisial

Adu ti namati nga iti panaggawidna, matuntonan met laengen ti kinapudno.

Ngem anian a pannakaupay dagiti umili ta kalpasan ti nawatiwat a panagpalutpot a naisayangkat iti Senado tapno maitudo no asino ti adda iti likudan ti nasao a fertilizer scam, nagsasanggala ti panagpalutpot, nakiro ken di ammon dagiti umili ti patienda ket in-inut a naglumen agingga iti naipasirok iti ikamen a kas kunada.

Iti kaudian a damag, agkandidato kano daytoy nga opisial iti probinsiada. Ket no mangabak, sigurado la ketdi a maiwalinto metten ti kasona, kas iti pannakaiwalin dagiti kaso dagiti dadduma a nangato nga opisial a nagpabutos tapno maikkanda iti pannalaknib iti kaso a nakaisawsawanda.

Dakamatentayo pay ditoy ti ZTE deal no sadino a dimmanon ti alingasawna iti kangatuan a koridor ti turay.

Mainaig daytoy iti pannakaipasdek koma ti maysa a broadband a maidanon kadagiti nadumaduma a suli ditoy pagilian.

Napintas daytoy a proyekto iti sanguanan ti isasagpattayo iti makunkuna nga information technology.

Ngem gapu ta adda “naiwalin” iti grasia gapu iti mapapati nga ibaballaet ti “padre de pamilia”, limtuad ti buyok a saan koma a naammuan dagiti umili no di gapu iti panagkiak ti nakugtaran.

Ngem ania ti napasamak? Kalpasan ti nabayag a panagpalutpot iti Senado a nakapaayaban dagiti nadumaduma a nangangato a turayen, awan pay ti naglawaganna, no ania ti pudpudno a napasamak ken mabalin a santo laengen matuntonan ti kinapudno no awanton iti serbisio dagiti naisawsaw iti daytoy a kontrobersia.

Ita, diay dandani nasulek ti matana gapu iti panangitudotudo ti inakusaranna a bimmiang, agkandidato a senador. Diay met napabasol a naggandat nga agpasuksok, saksaklotennan ti dakulapna ta nakaretiron iti serbisio ket nalatak pay ketdin diay impatakderna a panganan nangruna iti “hamburdier”. Diay nakarian iti grasia para iti nadardaras a pannakaaprobar ti proyekto, kasla bola a maipasapasa kadagiti ahensia a saan met a maikanatad iti pagsiribanna ngem kasla pay la alimatek a kumkumpet uray iti baet ti masansan a panangliblibbi dagiti kritiko iti likudanna. Diay met maysa a nagibutaktak nga adda mapapati a panaglana iti dakulap, kasla bannuar a dinirdir-ian dagiti agad-adal kadagiti pagadalan a nakaawisanna a nagbitbitlaan, Maysa metten a kandidato para senador, kaduana diay dandani nasulek ti matana.

Kasta ditoy pagilian. No saan a politika ti pagballatekanda, agbalin a kasla superhero dagitoy kontrobersial a personalidad nga id-idoluen dagiti umili iti apagbiit, ngem ad-adu nga amang a kasda iti layap nga agandap iti apagdarikmat sadanto aglumen.

(Adda tuloyna)