Panaglabsing dagiti opisial kadagiti pagannurotan iti community quarantine

NAGDAKES a pagteng a no dagiti kadawyan nga umili ti masukalan nga aglabsing kadagiti nayetnag a pagannurotan iti Coronavirus disease 2019 community quarantine ket mabalud wenno mamulta ken ag-trending pay iti social media. Ngem no nangato nga opisial ti gobierno ti mabisto nga aglabsing ken biddut ti inaramidna ket agpatingga lattan ti panag-sorry wenno panagkiddaw iti dispensa. 

Nagadun nga ordinario a Pilipino dagiti naipadamag a nagmulta, naidarum ken nakulong kadagiti custodial centers iti sumagmamano nga aldaw ken lawas gapu ti pannakatiliwda nga aglabsing kadagiti simple a pagannurotan iti lockdown kas kadagiti natiliw kabayatan ti curfew, saan nga awtorisado a rummuar kadagiti pagtaenganda, awanan iti facemask ken dadduma pay a nalag-an a kaso. 

Addanto met ngata nalinteg a pagturongan dagiti imbestigasion mainaig kadagiti kaso a nakainaigan dagiti nangato nga opisial ti gobierno?

Itay napalabas a lawas, kiniddaw dagiti adu a residente iti Baguio City ti panangideklarar ti Sangguniang Panglunsod ken ni San Juan City (Metro Manila) Mayor Francis Zamora a “persona non grata” gapu iti panaglabsing iti health protocol iti saanna a panangikankano iti checkpoint ken panagdalan iti umno a proseso iti iseserrekda ken ti convoy dagiti luganda nga agkakadua sadiay Kennon Road sakbay a sumrekda iti siudad.

Kinondena dagiti adu nga umili iti Baguio City iti inaramid ni Zamora ken dagiti kakaduana ta dayta ket kayariganna iti saan a panangrespeto iti pagannurotan ken insulto ti panagbalin ti siudad a maysa kadagiti modelo iti pananglapped ti panagraira ti Covid 19.

Nagkiddawen ti dispensar ni Zamora ken ni Baguio City Mayor Benjamin Magalong ken kadagiti umili. Inlawlawagna a napanda ken dagiti kaduana sadiay Baguio City tapno mapanna bisitaen ti asawana a masakit.  Inlawlawagna a nakaturog idi lumasat ti komboyda iti checkpoint ket saanna nga ammo ti saanda a panagsardeng ken panagdalan iti health protocol.

Maibasar iti imbestigasion, pinara dagiti polis a nakabantay iti checkpoint ti convoy ni Zamora a buklen iti innem a lugan. Ngem nagsarimadeng laeng ti police lead car a nangibaga a kaduada dagiti behikulo a sumarsaruno kadakuada. Kalpasanna, nagderetsodan sadiay Baguio Country Club.

Kasla agparparang nga inosente ni Zamora iti pasamak ket mapaglandekan ti police lead escort karaman dagiti kaduana a polis, ket nayakardan iti destino manipud San Juan City Police Station ken addadan iti National Capital Police Office, ken posible a mapilaanda iti kaso nga administratibo iti “breach of quarantine protocol.” 

Nakalkaldaang dayta a panaglabsing iti health security protocol dagiti polis ken lokal nga opisial ta isuda ti kangrunaan a natudingan a mangipakat kadagiti pagannurotan para iti nasamay a pannakaipakat ti lockdown. Ngem agparparang a saanda a kayat ti sumurot kadagiti nayetnag a paglintegan a posible nga iti panaglabsingda ket agpeggad iti virus dagiti umili ken agnaed iti dayta a siudad.

Dayta ket nalawag a pammaneknek ti mentalidad dagiti dadduma nga opisial ken dagiti pasurotda nga isuda ket “exempted” kadagiti paglintegan a pagdaldalanan dagiti pribado a tattao wenno kadawyan nga umili.

Nagkas-ang ti panaglabsing ni Zamora iti health protocol sadiay Baguio City ta idiay San Juan City a pagturayanna ket naaresto ti kabalubal ti pamiliada iti politika a ni sigud a Senador  Jinggoy Estrada iti alegasion a panaglabsing iti social distancing iti panagiwaras iti relief goods kadagiti barangay iti dayta a siudad.  Nalipatan ngata ni Zamora a pinalagipan dagiti escort-na a polis nga uray no addada iti gobierno ket nasken nga agdalanda kadagiti border checkpoint ken dagiti security health protocols?

Ti police lead escort laeng ngatan ti nangikeddeng a labasanda lattan ti checkpoint tapno saandan a mataktak? No innakeman ti police lead escort ti pannakalabsing ti quarantine protocol, addanto met ngata patas a pagbanagan ti kaso a maipila kenkuana, wenno awanto laengen ti banagenna.

Nakalkaldaang ti kananakem dagiti dadduma a polis ken opisial ti gobierno ta agsasaruno dagiti pannakainaigda kadagiti kontrobersial a panaglabsing kadagiti quarantine protocol.

Nagbalin a kontrobersial ti panagkasangay ni NCRPO Director Major General Debold Sinas idi Mayo 8, 2020 gapu iti napasamak a “mañanita” iti headquarters-da a nangkablaawan kenkuana dagiti nangato a pasurotna a nakalabsingan iti social distancing, panagaruat iti facemask ken pannakaangay iti mass gathering kabayatan ti lockdown.

Adda dagiti nangkiddaw iti pannakaikkat ni Sinas iti posisionna. Ngem dinependeran ken inabsuelto met ni Presidente Rodrigo Duterte ti heneral ta kasapulan unay ti serbisiona a mangidaulo ti NCRPO iti agdama a krisis.

Maysa pay a kontrobersial a breach of quarantine protocol ket ti inaramid ni Senador Aquilino “Koko” Pimentel III a nagpositibo iti COVID-19. Idi Marso 25, 2020, napanna intulod ti aganak nga asawana sadiay Makati Medical Center, ken napan pay naggatang iti department store iti laksid a maibilangen isuna a “person under investigation” ta nagdalanen iti test ket rebbengna a naka-quarantine isuna. Addan iti Department of Justice ti reklamo kontra ken ni Pimentel ken maur-urayen ti turongenna.

Makaparurod ti inaramid dagitoy a sumagmamano nga opisial ti gobierno ta iti laksid ti kinangato ti posisionda ket saanda a naamiris ti peggad a mabalin nga ibunga ti pananglabsingda kadagiti pagannurotan. Nakalkaldaang ta imbes nga agbalinda a modelo iti kinatudio iti linteg ngem isuda a mismo ti pagulidanan ti kinasukir ken killo nga aramid a rebbengna a kondenaren dagiti umili.