Panaglukat ti School Year 2019-2020

NAAN-ANAY kadin a nakasagana ti gobierno nangruna ti Department of Education, nagannak ken estudiante iti panaglukat ita nga aldaw ti School Year 2019 – 2020 iti intero a Pilipinas?

Impalgak ni DepEd Secretary Leonor Briones a nakasaganan dagiti mangisursuro ken pasilidad para ti panaglukat ti klase a mangakomodar kadagiti estudiante manipud Kindergarten agingga iti Grade 12 iti sapasap a pagilian.

Maibasar iti record ti DepEd, adda agarup 26.8 Million a nagenrol kadagiti public schools ita nga School Year. Ad-adu nga amang ngem ti 26 Milion a nagenrol itay napalabas a tawen.  

Para iti naannayas ti panaglukat ti klase kadagiti public schools, inyusuat ti DepEd ti Oplan Balik Eskwela ken ti Brigada Eskwela tapno maisagana dagiti pagadalan para ti panaglukat ti klase.

Impakaammo pay ti DepEd ti pannakabangon dagiti nayon a classrooms ken pannakaala dagiti nayon a kabarbaro a mangisursuro tapno mabalanse dagiti umad-adu nga estudiante kadagiti public schools. Agkasapulan ti DepEd iti nayon a 30,000 a mangisursuro gapu ti kaadu dagiti nagenrol ita nga School Year ken kasukat dagiti nagretiron iti serbisio.

Iti laksid ti pammasingked dagiti DepEd officials, manamnama nga addanto latta dagiti nabayagen a tinawen a problema a mapadpadasan iti panaglukat ti klase. Adda latta dagiti eskuela nga agkurang dagiti classrooms ken dadduma pay a pasilidad, textbooks ken mangisursuro. Uray no ikagkagumaan ti DepEd a maipangato ti lebel ti serbisio dagiti public schools, ngem saanda a magabenan gapu ti kaadu ti bilang dagiti pangpubliko a pagadalan iti intero a pagilian.

Kadagiti dadakkel a siudad, nangruna sadiay Metro Manila, agsobsobra latta iti standard a bilang a laonen nga estudiante dagiti classrooms a makaapektrar ti kalidad ti edukasion. Agkurang met latta dagiti classrooms kadagiti adayo wenno nasulinek a lugar nangruna kadagiti kabambantayan a probinsia. Adu latta dagiti mangisursuro nga agiggem iti dua wenno ad-adu pay a grade class gapu ti kinakurang dagiti teachers a mayat a mapan agisuro kadagiti eskuelaan a narigat a madanon gapu iti kaawan dagiti nasayaat a kalsada.

Kangrunaan a maringgoran dagiti nagannak iti panangisakadda iti panagadal dagiti annakda. Mangrugi manen dagiti inaldaw a paggastosan para kadagiti annakda nga agbasa. Uray pay libren ti registration ken matrikula dagiti estudiante, adu latta dagiti bayadan ken kontribusion a masingir kadagiti nagannak a maipaulog kabayatan ti panagtataripnong ti Parents and Teachers Association. No dadduma, dagiti paggastosan, gannuat ken proyekto nga iyusuat ti PTA para ti sapasap a pagsayaatan ti eskuela ken dagiti estudiante ket isu ti puon ti saan a pagkikinnaawatan dagiti nagannak gapu ta nagduduma ti lebel ti panunot ken panagbiag. Ngem rumbeng a nasayaat ti panagtutunos dagiti nagannak, mangisursuro ken komunidad tapno agbalin ti eskuela a pagubbogan iti nasayaat a sursuro ken panaglalangen dagiti estudiante. Awan ti samiren dagiti nagannak a tuok ken rigat iti panangpabasada kadagiti annakda ta ibilangda ti adal a kapatgan a maisagut ken maipatawidda kadagiti annakda a saanto a pulos mapukaw agingga iti unos ti panagbiagda.

Para kadagiti pupil ken esudiante, dakkel a pannakaikawa dagiti ubbing a sumrek iti Kindergarten, ken dagiti grade schoolers nga agsubli kadagiti pagadalan kalpasan ti napaut a bakasion. Maayatan met dagiti dadduma nga estudiante nga agsubli iti eskuela ta makadennada manen dagiti gagayyem ken sigud a kaklaseda. Narigat para kadagiti estudiante ti agbasa, ngem nasken nga aganus ken agsakripisioda tapno makaadalda ket maisagana ti naraniag a masakbayanda.

Saan laeng a DepEd, nagannak ken estudiante dagiti kangrunaan a maseknan iti panaglukat ti School Year, ngem uray pay dagiti dadduma nga ahensia ti nasional ken lokal a gobierno ken dagiti barangay ken komunidad.

Impalgak ni Philippine National Police Chief General Oscar Albayalde a mangideployda iti 30,000 a polis kadagiti kangrunaan a pagadalan iti nagduduma a lugar ti pagilian tapno mapatalgedan ti urnos, kappia ken talna kadagiti uneg ken arubayan dagiti pagadalan. Uray kadagiti barangay, makikaysa met dagiti barangay tanod a mangtagiben ti urnos ken talna kadagiti ruar ti pagadalan. Adda latta ngamin dagiti rinuker ti pampanunotna a manggundaway kadagiti estudiante no addada iti ruar dagiti eskuela.      

Maysa a tinawen a nadagsen a problema dagiti estudiante kabayatan ti School Year ket ti kasasaad ti panawen ta mapasungadanen ti rainy season wenno matutudo a tiempo a mangpataud kadagiti layus ken bagyo a tubeng ti natalged nga ipapan panagbasa dagiti estudiante. Masansan ti pannakasuspende ti klase no adda bagyo ken dakes ti panawen. Kangrunan a reklamo dagiti nagannak ket ti naladaw a pannakasuspender ti klase a sa laeng mayanunsio no napalubosandan dagiti annakda a mapan agbasa a puon ti pannakailawlaw-anda a rimmuar a nangsarakusok iti dakes a panawen.

Dayta ti gapu a kalaksidan iti Hunio ken nagduduman a bulan ken addan dagiti naladladaw ti panaglukat ti klase kadagiti pribado nga eskuela, ngem sakupenna met latta ti matututodo a tiempo ta uray iti Nobiembre ken Disiembre ket adda lattan dagiti napigsa a bagyo gapu iti epekto ti Climate Change wenno Global Warming.

Maysa pay a problema kabayatan ti School Year ket ti karigat ti pagluganan dagiti estudiante a mapan agbasa ken agawid nangruna kadagiti siudad gapu ti kaawan iti epektibo a mass transportation system iti pagilian. Kakaasi dagiti estudiante a makilinnetlet kadagiti napusek a lugan tapno saanda laeng a maladaw a mapan agbasa ken no agawidda.

Kadagsenan pay a problema iti panagsubli ti klase ket ti gastosen dagiti estudiante iti panagadalda ket dagiti inaldaw nga allowance ken proyektoda. Marigatan unayen dagiti agpabpabasa a nagannak a mangisakad ti panagadal dagiti annakda gapu iti agtultuloy nga ingingina dagiti magatgatang a kangrunaan a produkto ken serbisio. Saan met ngarud a balanse ti masapulan wenno matgedan dagiti nagannak tapno mayanayda kadagiti inaldaw a kasapulan.

Nadagsen man dagiti problema iti panaglukat ti klase, ngem nasken a sanguen ken ibaklay daytoy dagiti Pilipino ta para kadagiti kaaduan nga umili ta ti edukasion ti mangiturong iti naan-anay a panagdur-as ti Pilipinas. (Eden A. Alviar)