Panaglukat ti School Year 2020 – 2021 iti sango ti pandemia

ITA nga aldaw – Agosto 24, 2020 – koma ti general opening ti School Year 2020 – 2021, ngem imbilinen ni Presidente Rodrigo Duterte iti Department of Education ti pannakaisanud ti panaglukat ti klase dagiti pangpubliko a pagadalan inton Oktobre 5 ita a tawen tapno maikkan ti naan-anay a panagsagana dagiti mangisursuro ken kadagiti kasapulan a ramit ken pasilidad para iti blended learning, naisangsangayan a wagas ti panangipaay ti edukasion.

Uray no naisanud ti general opening ti School Year, adu a pribado a pagadalan dagiti manglukat ti klasena ita nga aldaw iti nagduduma a paset ti Pilipinas nangruna kadagiti lugar nga addan iti nababa a tukad ti community quarantine. Sumagmamano nga aldaw sakbay ti immuna a naituding a petsa ket nagapila dagiti school administrators kadagiti pribado a pagadalan a mapalubosandan a manglukaten iti klaseda ket pinalubosan ida ti DepEd ken ti National Inter-Agency Task Force for the Management of Infectious Disease kalpasan a pinasingkedanda ti panangsurotda kadagiti preventive measures ken health protocols tapno masaluadan ti salun-at dagiti estudiante ken mangisursuro.

Adu dagiti nasdaaw iti kellaat a panangisanud ti DepEd iti general opening ti klase ta nabayagen nga inrakurak ni Education Secretary Leonore Briones a nakasaganadan para ti panaglukat dagiti pagadalan babaen ti blended learning a buklen ti nagduduma a wagas ti panangisuro kas ti online a panagaramat kadagiti computers, cellphone ken dadduma pay a gadget; panagaramat ti radio ken telebision, ken modular a maiwaras kadagiti estudiante.

Ngem dinillaw dagiti senador ti kinakurang ti panagsagana ti DepEd para ti blended learning. Napaliiwda ti kinakusel pay laeng dagiti mangisursuro para iti daytoy naidumduma a wagas ti panangisuro a saanda a naadal idi agbasbasada iti kolehio.

Napaliiw met ti publiko a saan pay a nakasagana dagiti pasilidad para ti online learning ta nabuntog ti signal ti internet ken adu pay a lugar dagiti saan a madanon ti internet connections a kaaduanna ket kadagiti laeng siudad ken nadur-as nga ili ti ayanda. Agkurang met ti bilang dagiti mangisursuro nga addaan iti naan-anay a panagsanay iti panagaramat iti moderno a teknolohia kas instrumento ti online learning. Adu pay laeng dagiti nagannak ken estudiante iti awanan iti laptop computers ken moderno a cellphone ken gadget nga usarenda iti online learning.

Naobserbaran pay ti saan nga umanay dagiti maipaay a libre nga oras kadagiti television channels, ken saan a madanon ti signalda kadagiti adayo a lugar,

Napaneknekan pay dagiti adu a biddut kadagiti naiparuar a modules nga insagana dagiti mangisursuro para kadagiti estudiante.

Naduktalan dagiti adu a parikut a lapped iti nasamay a panangisuro, ngem saan koma a dayta ti mangltubeng ti panaglukaten iti klase. Ad-adda a makalapped ti panagadal dagiti estudiante ti kaadu dagiti kaso ti maakaran ti Covid 19 iti maysa a lugar kas ti Metro Manila ken kabangibangna a probinsia nga agtaltalinaed a sentro ti panagwaras ti virus iti Pilipinas.

Adun dagiti probinsia a kontrolado iti panagwaras iti Covid 19, ket mabalin koman a manglukat ti klase kadagitoy a lugar. Adu nga eskuela kadagiti probinsia dagiti limitado laeng ti bilang dagiti estudianteda aglalo kadagiti pagadalan kadagiti nasulinek nga ili ken barangay. Mabalin koma nga uray ti face-to-face learning ket mabalin lattan nga adaptaren, ngem gapu kadagiti nayetnag a pagannurotan nga imparuar ti DepEd ken IATF ket mapilitanda a suroten tapno saanda nga aglabsing.

Inrakurak ti DepEd a nababbaba iti agarup uppat a million ti bilang dagiti nagenrol ita nga School Year nangruna kadagiti pribado nga eskuela gapu iti rigat ti ekonomia a ginubuay ti pandemia.

Saan a mailibak nga adu dagiti nagannak dagiti marigatan a mangpaadal kadagiti annakda ita a panawen. Adu met dagiti agamak a maakaran dagiti annakda iti Covid 19 no mapanda agbasa ket kaykayatdan a buybuyaen ida nga agmalem ken agpatnag kadagiti balbalayda.

Ngem saan koma nga agari ti buteng kadagiti nagannak tapno ibaonda, ikarigatanda nga isakad ken bayabayenda nga agbasa dagiti annakda ta sayang ti maysa nga School Year a mabakanteda. Imbes nga addada laeng nga agaayam wenno agar-aramid kadagiti banag nga awan ti mamaayna ket nasaysayaat laengen nga ituloyda ti panagbasada para ti naranraniag a masakbayanda.

Adda man dagiti manguyaw wenno mangtagibaba iti kinasamay ti blended learning, ngem nasaysayaat laengen daytoy tapno dagiti estudiante ket agtultuloy ti panagadalda kabayatan ti panangur-uray ti nasamay a bakuna ken agas ti Covid 19 tapno nawayanton nga agsubli dagiti estudiante kadagiti eskuela para ti normal a panagbasada. Napateg unay ti edukasion para kadagiti Pilipino ta daytoy ti tulbek ti panagprogreso, ken saan koma a sayangen dagiti mangisursuro, nagannak ken ubbing ti School Year 2020 – 2021 nga awan ti naindaklan a maaramidanda.