Footer

Panagminas iti Bakun, naaprobaran

BAKUN, Benguet – Iti baet ti isusupiat dagiti residente ti Nueva Vizcaya, inaprobaran dagiti opisial ditoy ti panagminas ti maysa a kompania iti daytoy nga ili.

Segun ken ni Engineer Ruben Quitoriano, Jr., inhiniero ti RPI, inaprobaranen ti Mines and Geo-Sciences Bureau ken dagiti agtuturay iti daytoy nga ili ti panagbukibok ti kompaniada para iti posible a deposito ti balitok iti 1,000 ektaria a paset ti Barangay Gambang ditoy nga ili ken adda payen naalada a sertipiko ti pammalubos daytoy nga ili manipud iti National Commission on Indigenous Peoples.

Kalpasan ti dialogo iti nagbaetan ti RPI ken dagiti opisial ditoy nga ili, ken dagiti dadaulo dagiti nadumaduma a barangay a pakaibilangan ti Gambang Proper, Yago, Tood ken Tuwa-ok, napirmaan ti maysa a memorandum of agreement mainaig iti eksplorasion ti kompania iti dua a tawen nga agpatingga iti Mayo 21, 2010.

Sagudayen ti katulagan ti panangtarimaan ti RPI iti kalsada nga agturong iti Gambang ken ti pannakaipasdek iti potable water system iti nasao a lugar.

Nailanad pay iti MOA ti pannakayempleo dagiti residente ditoy iti panagminas ti RPI ken panangsueldona iti dua a mangisursuro iti Gambang Elementary School ken tallo a day care center workers.

Konkontraen dagiti residente ti Nueva Vizcaya ti aplikasion ti panagminas ti RPI agsipud iti amakda a maapektaranda iti nasao a proyekto kas iti posible a panagreggaay ti bantay ken pannakalayusda.#