Panagmula iti cacao, indagadag ni DV

CABUGAO, Ilocos Sur – Malaksid iti kape, ti panagmula iti cacao ti maysa nga ikidkiddaw ni Vice Governor Deogracias Victor Savellano tapno mataginayon ti produksion ti tsokolate iti probinsia.

Kinuna ni Savellano a nalaklaka a patanoren ti cacao ngem iti kape agsipud ta awan pilpilienna a lugar a pakaimulaanna, uray iti arubayan laeng a medio nalinong bassit ken masibogan.

Nadakamat ti bise gobernador nga adu idi ti agar-aramid iti tableya iti probinsia ngem gumatgatangda iti Divisoria ti raw materials nga aramatenda nga agaramid iti tableya.

“Dati rati, adda iti probinsia dagitoy a produkto ket saantayo koma nga itulok a mapukaw,” kinuna ni Savellano sana indagadag ti panagpaadu iti cacao tapno adda paggapuan ti raw materials a pagaramid iti tableya.

Ti tableya ti one-town one-product (OTOP) ti Salcedo, Ilocos Sur.#