Panagmula iti kayo a pagsungrod, naipaganetget

SAN JUAN, Ilocos Sur – Ipagpaganetget ti mayor ditoy nga ili ti panagmula iti kayo dagiti agmulmula iti tabako tapno adda madadaan a pagsungrod dagitoy iti panagpugonda.

Kinuna ni Mayor Benjamin Sarmiento a 30% iti mapastrek dagiti agmulmula iti tabako ti mapan laeng iti maigatang iti pagtungo iti pugon.

Indagadag ni Sarmiento nga apaman a agmula iti tabako ti mannalon, agmula metten iti kayo.

Segun ken ni Sarmiento, adda nabangon a municipal nursery sadiay Barangay Barbar ket ditoy ti pakapatanoran dagiti seedlings a maiwaras kadagiti mannalon a kayatna ti agmula iti kayo.

Ditoy San Juan ti maysa kadagiti ili iti Ilocos Sur a pakapatpatanoran ti nangato ti klaseda a bulong ti tabako.#