Panagmula iti ad-adu a tabako dagiti mannalon iti Ilocos Sur, awis ti NTA Director

BANTAY, Ilocos Sur — Panagmula dagiti mannalon iti Ilocos Sur iti ad-adu pay a tabako a birhinia gapu ta dakkel ti mapastrekda ken tapno mapagtalinaed daytoy nga industria ket ad-adu pay ti masagrap a pondo manipud iti Republic Act No. 7171 wenno Virginia Tobacco Excise Tax Law a pagbibingayan ti Provincial Government ken dagiti Local Government Units.

Dayta ti kangrunaan nga awis ni National Tobacco Administration Director Teofilo Quintal, kabayatan ti pannakiuman kenkuana dagiti kameng ti Ilocos Sur Integrated Press iti naangay a Kapihan iti Amianan Media Forum iti NTA Bantay Office. Kaduana a nakiuman iti media ni Diosdado Maduli, Supervising Tobacco Production Officer.

Inlawlawag ni Dir. Quintal nga iti masungad a panagmumula iti tabako a birhinia ket maaramid ti pannakapasingked ti tripartite agreement iti nagbaetan dagiti mannalon, traders ken NTA, ket namnamaenna a ngumato ti agdama a presio ti kada kilo iti tabako a birhinia. Inlawlawagna nga iti pannakapirma ti katulagan ket agpada a mapaboran dagiti mannalon ken komersiante, ken saan a malugi dagiti mannalon tapno maparegtada pay nga agmula iti tabako a birhinia.

Inaklonna a dakkel ti panagsuek ti produksion ti tabako a birhinia iti Ilocos Sur gapu ta adun dagiti mannalon ti agmulmula iti mais, nateng ken dadduma pay a produkto gapu ta adda dagiti libre a bin-i ken abono nga iwarwaras dagiti LGU. Inaklonna pay nga adda dagiti mannalon nangruna dagiti nadadaelen ti pugonda dagiti saanen nga agmula iti tabako a birhinia.

Inallukoyna dagiti mannalon iti Ilocos Sur ti panagmulada iti tabako a birhinia kadagiti siguden a mamulmulaan iti kastoy a produkto ken iseserrekda iti contract growing agreement kadagiti trading companies tapno sigurado ti paglakuanda ken nasayaat ti presioda.

Inrekomendana met kadagiti dadduma a mannalon ti panagmulada iti tabako a barley a nasuboken kadagiti dadduma a lugar. Impakaammona a dagiti sigud a lugar a saan nga agmulmula iti tabako ket pinadasda metten daytoy a produkto iti naglabas a tawen kas dagiti mannalon iti Vigan City, Bantay, Caoayan, Santa Catalina ken San Ildefonso, ket manamnama nga agtultuloy iti daytoy masungad a planting season.

Inlawlawagna a madadaan dagiti teknisian ti NTA ti panangbayabayda kadagiti mannalon a mayat nga agmula iti tabako tapno mapasingkedan ti kalidad ti produktoda.

Impakaammona nga iti laksid ti kampania kontra panagsigarilio gapu iti dakes nga epektona iti salun-at, ken ti ingangato ti sin tax law a nangapektar ti presio ti sigarilio ket naapektaran ti industria, ngem impasingkedna nga agtultuloy ti kaadda ti paglakuan iti tabako a birhinia no nangato ti kalidad ti produkto ta agkasapulan pay dagiti tobacco companies iti ballasiw-taaw iti adu a supply ti raw materials para iti sigarilio.

Impalgak met ni Mr. Maduli ti kaadda ti programa ti NTA para ti panagmula kadagiti kayo a pagsungrod iti pugon ti tabako tapno masukatan dagiti mapukan a kayo iti tunggal tobacco season ket masaluadan ti nakaparsuaan.

Impakaammo pay ni Dir. Quintal nga adda rinuk-atan ti Department of Budget and Management a nasurok a P2 billion RA 7171 fund para ti probinsia, kalaksidan pay kadagiti LGU, ket nagapila iti umno a pannakaaramat ti pondo ken pannakaipaay ti naan-anay a tulong kadagiti agmulmula iti tabako a birhinia.

Indariragna nga ikagumaan koma dagiti LGU nga allukoyen ken suportaran dagiti mannalon nga agmula iti tabako a birhinia tapno agtalinaed ti dakkel a bingay a maalada iti RA 7171 a mangipaay ti panagdur-as iti probinsia. Inlawlawagna pay nga adda met bingay dagiti LGU nga addaan iti agmulmila a tabako birhinia kas sagudayen ti R.A. 8240 wenno Barley Tobacco Excise Tax Law. ●