Panagpaagas iti kagat ti ayup babaen ti tandok, iparit ti ordinansa

SAN FERNANDO CITY, La Union – Inaprobaran ti sangguniang panlalawigan ti La Union ti ordinansa a mangiparit iti panagpatandok kas pangagas iti pannakakagat iti ayup nangruna iti aso, pusa ken uleg.

Kas sagudayen ti ordinansa a napauluan iti “An Act Prohibiting the Practice of Tandok in Treating Animal Bites” total a maiparit daytoy kadaanan a wagas a panagagas kadagiti makagat iti ayup nga ar-aramaten dagiti quack doctors wenno mannandok tapno bumassit ti bilang dagiti matay iti rabies gapu iti kagat ti ayup.

Kinuna ti ordinansa nga adda latta dagiti makagat iti aso, pusa, uleg ken dadduma pay nga ayup ti agtaray a mapan agpaagas kadagiti mannandok agsipud ta nalaklaka ti pagbayadda ngem no agpaagasda iti ospital wenno iti doktor.

Ngem kinuna ni Dr. Hector Beñas, provincial health officer, a dakdakkel ti risgo a matay ti nakagat iti ayup agsipud ta saan a napaneknekan iti medical science a masusop ti tandok ti gita ti kimmagat nga ayup.

Intuding ti ordinansa a mamulta ti aglabsing iti P5,000.00 wenno maibalud iti makatawen wenno isuda a dua, depende iti diskresion ti korte.#