Panagpabaro iti business permit, mabalin pay iti Pebrero

VIGAN CITY – Mabalin pay ti panagpabaro iti business permit iti bulan ti Pebrero nga awan ti multana, daytoy ti kinuna ti licencing officer ditoy siudad.

Indagadag ni City Licencing Officer Elpidio Palapala kadagiti addaan negosio iti Vigan City a gundawayan koma dagitoy ti panangpabaroda iti business permitda iti daytoy a bulan nga awan pay ti maipakat a multa.

Kinuna ni Palapala a ti immuna a dua a bulan ti tawen ti intuding ti ordinansa iti siudad a panagpabaro iti business permit ket no tumapogton ti Marso, maipakaten ti 25% a surcharge wenno penalty.

Tinawen a maisaysayangkat ti one-stop shop iti panag-renew iti business permit tapno nadardaras ti pannakaproseso daytoy.#