Panagpabettak iti eksplosibo iti maysa a pagtagilakuan, isolated case: kapolisan

VIGAN CITY – Isolated case ti napasamak a panagpabettak iti eksplosibo iti sanguanan ti maysa a pagtagilakuan sadiay Barangay 1 ditoy siudad idi parbangon ti Mayo 20 ket awan ti pagamkan dagiti residente ditoy, daytoy ti impasingked ti kapolisan.

Kasta met a kinuna ni Police Senior Supt. Nestor Felix, Provincial Director, nga improvised nga explosive device ti napabettak iti sango ti Danny Boy Hardware and Industrial Supply a masarakan iti Foxton building iti nagsulian ti Gen. Luna Street ken Quezon Avenue, Barangay 1, Vigan City idi agarup 2:00 ti parbangon ti nadakamat a petsa.

Innayon ti provincial director nga awan ti nasarakan ti SOCO a fragments iti lugar a nakapasamakan ti panagpabettak nga ingrediente ti bomba idinto nga inyarigna ti bimtak nga eksplosibo iti napigsa a rebentador.

Ngem nupay kunaen ti kapolisan a pangapsuten ti improvised explosive device, gapu iti pigsa ti naparnuay a kanalbuong, nadadael ti roll up door ti Danny Boy Hardware and Industrial Supply idinto a nabtak dagiti sarming a tawa dagiti kaarruba ti pasdek a business establishments a pakairamanan ti Shopper’s Mart ken ABC buildings.

Naireport nga agdagup iti P250,000.00 dagiti nadadael iti Foxton Trading, P100,000.00 iti Shopper’s Mart ken P450.00 iti ABC General Merchandise.

Kinuna met ni Vigan City Chief of Police Supt. Maximo Taclas nga awan ti gandat a mangdadael iti biag wenno iti imahe ti Siudad ti Vigan iti daytoy a panagpabettak iti explosive device agsipud ta napasamak ti insidente iti alas dose ti parbangon nga awanen ti matatao iti nasao a lugar.

Nupay kasta, kinuna ni Taclas nga adda nadakamat ni Ronald Daniel Tiu y Verzula, 52, ken akinkukua iti pagtagilakuan a posible a motibo ti panagpabettak ken pangrugiananda nga agimbestiga.

Ngem nagkitakit ni Taclas a nangipalgak iti nagan ti tao a nadakamat ni Tiu tapno saan a maunaan ti panagimbestigada.

Segun pay iti report manipud iti polis, nadakamat ni Tiu nga idi Nobiembre 2013, mapapati a nakaawat ni Sally Tiu nga asawana kadagiti threat messages iti selpon manipud iti saan nga am-ammo a tao.

Mapapati nga adda pakainaigan daytoy iti kaso kriminal nga impilana iti korte.

Nupay kasta, nasao ni Mrs. Tiu a nadismisen ti nasao a kaso.

Kinuna met ni Corazon Singson, akinkukua iti Shopper’s Mart, nga idi Pebrero 19 daytoy a tawen, nakaawat kadagiti ballaag a mensahe iti selpon a mapapati a mainaig iti kaso nga impilana iti korte.

Segun iti report, dua a CCTV ti naimuntar iti nasao a pasdek ngem maar-aramat laeng dagitoy a pagmonitor iti aldaw ken saan a nagirekord.

Ngem iti panangsukimat dagiti inbestigador iti CCTV a naimuntar iti Gen. Luna Street, adda nakitada a di pay nabigbig a tattao a nagkakalubbon iti motorsiklo a naglabaslabas iti lugar sakbay a napabettak ti eksplosibo iti dayta nga oras ti parbangon.

Kinuna ti kapolisan nga isubmiteda ti footage iti PNP Anti Cyber Crime Command para iti forensic examination.#