Panagpaputok, maiparit iti Vigan Heritage Village

VIGAN CITY – Kiniddaw ti sangguniang panlungsod ditoy iti Bureau of Fire Protection ti nainget a panangiyimplimentarna iti paglintegan iti panagpaputok iti Heritage Village ditoy siudad tapno di maulit ti dandani pannakauramna idi napalabas a tawen.

Kinuna ni Vice Mayor Franz Ranches a nangaramidda iti resolusion a mangidagadag iti BFP nga estriktaranna nga iyimplementar ti 1994 Public Safety Code, kas paset ti panangprotektar ti gobierno ti siudad iti heritage site a yan dagiti ancestral houses a naipatakder pay laeng idi tiempo dagiti Kastila.

“Idi Paskua idi 2007, adda dandani nauram a balay iti core zone gapu iti firecrackers (ket) dimi kayat a mapukaw daytoy nabaknang a tawid ti siudad,” kinuna ni Ranches.

Kinuna ti bise mayor a sagudayen ti Public Safety Code nga “adda bileg ti fire marshall a mang-determine iti lugar a pagpaputokan iti firecrackers, pyrotechnics, (ket) saan nga amin a disso, pagpaputokan lattan.”

Innayon ni Ranches a kasapulanto ti paglintegan tapno agbalin nga specific ngem no adda baro nga ordinansa, kasapulan pay ti public hearing isu a nangaramidda iti resolusion tapno adda pagtalgedan ti fire marshall a mangiyimplimentar a nainget saan laeng dagiti ordinansa no di pay amin a pagannurotan iti pyrotechnics ken firecrackers nga impaulog ti national government ken ti Philippine National Police.

“… Kas maysa nga ancestral city, napateg iti city government, napateg kadagiti taga-Vigan, isu a nakalista iti Unesco World Heritage list,” kinuna ni Ranches sana inyunay-unay a “dayta ti gapuna a protektaran ti tawid ti Siudad ti Vigan”.#