Panagpastrek iti pundo babaen ti sugal, kinontra dagiti Simbaan

BAGUIO CITY – Iti baet ti panangiduron dagiti barangay officials ti pannakaisubli ti Bingo sa Barangay a  pamastrekan iti pundo, imbatad dagiti Simbaan ditoy ti panangkontrada iti aniaman a kita ti sugal.

Kinuna ni Baguio City Bishop Carlito Cenzon a mabalin met ti agpastrek iti pundo a saan a babaen iti sugal kas panangibatadna iti isusupiatna iti pannakairiing ti panagsubli ti Bingo sa Barangay.

Aganay 50 a konseho ti barangay ti nangidagadag iti panagsubli ti Bingo sa Barangay iti siudad.

Segun iti resolusion ti Association of Barangay Captains ditoy, legal ken balido ti panagpastrek iti pundo babaen iti bingo agingga iti adda maikontra a pangngeddeng manipud iti Korte Suprema.

Nagbatayan ti ABC ti pangngeddeng ni Judge Antonio Esteves idi Disiembre 4, 2006 a legal ken binding ti BSB nga imanmanehar ti ABC kas sinaguday ti Local Government Code ken saan a kasapulan ti permit manipud iti lokal wenno iti nasional a gobierno.

Ngem sabali pay a dadaulo ti Simbaan, ni Rev. Simplicio Dang-awan, Jr. ti United Church of Christ in the Philippines-Baguio, ti nangibatad a  kontraenna ti aniaman a kita ti sugal sana innayon a  ti “gobierno a mangipalubos iti daytoy, napukawnan ti moral a karbengan a mangituray”.

Kabayatanna, kiniddaw dagiti opisial ti Green 2 Corp. ti panangipalubos ti konseho ti siudad ag-operate iti small town lottery (STL) iti siudad.

Idi napan a tawen, saan nga inanamongan ti konseho ti aplikasion ti G2C ken dagiti dadduma pay a pakaibilangan ti D’New Ace Builders, Joecalf Amusement Corp. ken ti Sumikadan ti Cordillera Gaming Corp. nga ag-operate iti STL iti siudad.#