Editorial: Panagpili iti sumaruno a PNP Chief | Tawid News Magazine - Weekly Ilocos News 📰

Panagpili iti sumaruno a PNP Chief

MAYSA ti Hepe ti Philippine National Police kadagiti kabilegan nga opisial iti pagilian ta idauluanna ti 195,000 nga armado a miembro a naiwaras kadagiti amin a rehion, probinsia, siudad ken ili, isu a nasken a maaddaan iti modelo a mangidaulo.

Adu dagiti kameng ti PNP a pinilida ti nagpolis gapu ta ibilangda kas “vocation and passion” a pakaragsakanda ti agserbi iti pagilian ken padada a tao. Adda met dagiti nagpolis a mangibilang a dayta ket propesion laeng. Adda pay dagiti sabali ti intension iti panagpolisda nga ibilangda a proteksion iti interesda.

Iti panagtakem ni Presidente Rodrigo Duterte, binigbigna ti naindaklan nga akem dagiti polis iti pannakagun-od ti karina idi panawen ti kampania a mangpasardeng iti krimen nangruna ti panagraira ti illegal a droga iti las-ud ti tallo agingga iti innem a bulan.

Idi nangabak a Presidente ni Duterte, dinutokanna a PNP Chief ti matalekna a heneral a Ronald de la Rosa, ti Philippine Military Academy Sinagtala Class of 1986, ken sigud a Chief of Police sadiay Davao City.

Kalaksidan ti panangingato ni Duterte iti sueldo ken benepisio dagiti polis ken militar, impasingkedna ti suportana kadakuada iti pannakikaysada iti kampania kontra ti krimen ken illegal a droga.

Nadara ti kampania kontra illegal a droga kabayatan ti panagtakem a PNP Chief ni De la Rosa. Agarup 3,500 dagiti napapatay a mapapati nga adda pannakainaigna iti droga. Ginasut a ribu met dagiti simmuko kabayatan ti Operation Tokhang.

Agretiro koman a PNP Chief ni De la Rosa idi Enero 21, 2018 a pannakadanonna ti compulsory retirement age. Ngem inyalud-od ni Duterte ti serbisiona agingga idi Abril 21, 2018; kalpasanna, nadutokan a Director General ti Bureau of Corrections a nagserbianna agingga idi Oktobre 12, 2018 idi nagkandidato a para Senador a nangabakanna.

Simmukat ken ni De la Rosa kas PNP Chief ti classmate-na iti PMA Class 1986 a ni General Oscar Albayalde, kagiddanna a nagakem a Director ti National Capital Police Regional Office. Naglatak iti media ni Albayalde gapu iti kinaistriktona kadagiti pasurotna bayat ti panagakemna kas NCRPO Director.

Mapapati a ti panaglatak ni Albayalde kas sigud nga NCRPO Director ti nakaallukoyen ti Presidente a nangdutok kenkuana kas PNP Chief kalaksidan pay ti nangiyendorso kenkuana.

Nakalkaldaang ta dua a bulan sakbay ti panagretiro ni Albayalde kas PNP Chief ket rimmuar ti kontrobersia a nakainaiganna idi 2013 a Senior Superintendent wenno koronel pay laeng ti rankona ken Provincial Director pay laeng sadiay Pampanga Police Provincial Office idi 2013.

Iti panagtestimonia ni Baguio City Mayor Benjamin Magalong, sigud a Director ti PNP Criminal Investigation and Detection Group, iti imbestigasion ti Senate Blue Ribbon Committee and Committee on Justice, naibulgar ti kontrobersial nga anti-illegal drug operation dagiti 13 a polis sadiay Mexico, Pampanga idi Nobiembre 29, 2013 a mapapati nga adda pannakainaigda iti illegal raid, agaw-bato, palit-suspek, ken drug recycling.

Naguyod ni Albayalde iti dayta nga operasion ta isuna idi ti Pampanga Provincial Director, ket idi isunan ti NCRPO Director idi 2017 ket tinelepunuanna ti agdama a Region 3 Police Office a ni Chief Supt. Aaron Aquino a saanna nga iyimplementar ti dismissal order kadagiti 13 a polis a nainaig iti operasion. Nagpalawag pay ti sigud a Region 3 Police Office Director Chief Supt. Rudy Lacadin idi napasamak ti kaso dagiti 13 a polis nga inaklon ni Albayalde kenkuana ti ammona iti anti-drug operations.

Segun ken ni Albayalde, tinelepunuanna laeng ni Aquino ta dinamagna ti status ti kaso ta agsalsaludsod dagiti kapamilia dagiti nainaig a polis a sigud a pasurotna. Pinaglibakanna met ti alegasion ni Lacadin.

Pinarnuay ti kontrobersia, ti ad-adda a pannakamantia ti imahe ti PNP ta agparparang a saan a serioso ken patas ti maisaysayangkat nga internal cleansing a mangkonkonsintir kadagiti ninja cops ta mismo a ti agdama a PNP Chief ti ak-akusaran a mismo dagiti retiradon a heneral.

Addan dagiti mangkidkiddaw nga ikkatenen ti Presidente ni Albayalde iti akemna tapno masalbar ti PNP iti eskandalo. Ngem impasingked ni Duterte a kasapulan ti naan-anay nga ebidensia kontra iti PNP Chief. Mabalin a saanen a marelibuan ta mayuray laengen ti panagretirona inton Nobiembre 8, 2019 a mandatory retirement age dagiti polis. (Bimmaba iti puesto ni Albayalde idi kalman, Okt. 14. Ni Lt. Gen. Archie Francisco Gamboa ti nadutukan a PNP Officer-in-charge. – Ed.)

Inrakuraken ni Interior and Local Government Secretary ken National Police Commission Chairman Emmanuel Año nga isubmitarda ti listaan dagiti PNP Chief candidates ken ni Duterte agingga inton Oktobre 20, 2019, ket addanton iti Presidente a mangpili iti sumukat ken ni Albayalde.

Dagiti nalatak a mapagpilpilian a sumaruno a PNP Chief ket da Major General Guillermo Eleazar, Lt. Gen. Archie Gamboa; Lt. Gen. Camilo Cascolan; ken Brig. Gen Vicente Danao Jr. Agpapada dagiti uppat a heneral a nagturpos iti PMA. Class 1987 ni Eleazar; Class 1986 met da Gamboa ken Cascolan; ken Class 1991 met ni Danao. Agpapada a nagserbi iti Davao City da Gamboa, Cascolan ken Danao.

Naipadamag met nga adda iyen-endorso dagiti opisial a nagturpos iti Philippine National Police Academy a ni Brig. Gen. Gilberto Cruz ti PNPA Class 1986.

Duan a PNP Chief ti dinutokan ti Duterte a mangipatungpal iti karina a mangparmek ti kriminalidad ken panagraira ti pagilian iti las-ud ti tallo agingga iti innem a bulan. Ngem nasurok laengen a dua a tawen ti nabati iti terminona ngem saanna pay a natungpal ti karina gapu ta adu ti pagkurangan ti PNP. Rebbengna a saanen nga agbiddut ti Presidente iti pilienna a PNP Chief nga agbalin a pagwadan dagiti pasurotna.