Panagproseso iti mangga, naisayangkat

SAN EMILIO, Ilocos Sur – Nangisayangkat ti Department of Trade and Industry babaen ti pannakikammayet ti Ilocos Sur Polytechnic State College iti nadurdur-as a panagsanay mainaig iti panagproseso iti mangga ditoy nga ili itay nabiit.

Nagpartisipar ditoy dagiti 30 nga agindeg a miembro ti Rural Improvement Club, benepisario ti Pantawid Pamilyang Pilipino Program ( 4 Ps) ken kooperatiba no sadino a nagsanayda iti panagproseso iti mangga tapno agbalinda a pastillas, jam, ken preservatives.

Kinuna ni DTI Provincial Director Grace Lapastora, a babaen ti nasao a panagsanay, naadalan dagiti partisipante iti baro a teknolohia iti panagproseso iti mangga tapno makapartuatda kadagiti local delicacies a mabalinda nga ilako iti merkado.

Pagpakpakan laeng dagiti agindeg kadagiti dingnguenda dagiti matmatnag a maluom a mangga.#