Panagpuor iti drilling machine iti Quirino, Ilocos Sur, inako ti Alfredo Cesar Command

BANTAY, Ilocos Sur – Dagiti kameng ti New Peoples’ Army Alfredo Cesar Command-Ilocos Sur dagiti nagpuor iti drilling machine ti maysa a kumpania ti minas sadiay Sitio Segseg, Barangay Patiacan, ditoy nga ili idi Abril 11.

Daytoy ti konklusion ti nabuangay a komite iti naisayangkat a COLA validation/meeting iti BOQ Nipa Hut, Camp President Elpidio R. Quirino, Bulag ditoy nga ili idi Abril 14.

Timmabuno iti daytoy a miting dagiti opisial ti kapolisan a pakairamanan da PSupt. Feliciano T. Gubatan, DPDO, chairman ken Supt. Edwin C. Balles, Intel Officer; Supt. Jugith del Prado, Investigatioin Officer; Supt. Roberto Vocal, PCR Officer: PCI Verminn Suen, Provincial Legal Officer Provincial Legal Officer; PCI Leonardo Arce, Provincial Crime Laboratory Officer; PCI Modesto Carrera, PCIDG; PSI Modesto Carrera, PCDIG; Leonardo Q. Arce, Provincial Crime Laboratory Officer; PCI Modesto Carrera, PCIDG; PSI Sosimo Reyes, COP; Capt. John Ian Calera, SE MICO ken PI Romeo Gachalian, RIU-kas miembro.

Limtuad iti panagpalutpot ti komite a ti National Peoples’ Army iti babaen ti Alfredo Cesar Command-Ilocos Sur ti nangako nga akinresponsible iti pannakapuor ti drilling machine kas pannusada iti nasao a kompania gapu iti mapapati nga uppat a tawen a destruktibo nga eksplorasion iti nadakamat a lugar ken kas suportada iti isusupring ti komunidad iti pannakaiyalud-od ti proyekto ti eksplorasion ti nasao a kompania babaen ti reperendum a naangay idi Abril 2, 2014.

Binabalaw pay ti NPA/ACC ti National Commission on Indigenous Persons (NCIP) gapu iti panagbalinna a masansan nga instrumento iti mapapati a pannakaliput dagiti interes dagiti umili idi sinuportaranna ti panagmaniobra ti kompania a makaala iti Free Prior Informed Consent (FPIC) manipud kadagiti agnaed iti baet dagiti maulit-ulit nga isusupringda.

Maipalagip nga idi agarup 12:40 ti bigat ti Abril 11, sangapulo a lallaki ken 4 a babbai a nakaarmas ti simmangpet iti drill site iti nadakamat a barangay ket imbilinda kadagiti drillers crew ti panagsardengda nga agtrabaho.

Imbilin dagiti suspek kadagiti trabahador ti panagpas-angadda idinto a simrek ti sumagmamano kadagitoy iti inaladan ti drill site sada binuyatan iti mapapati a gasolina iti rig machine.

Imbilin dagiti suspek ti ipapanaw dagiti trabahador iti lugar sada pinuoran ti drilling machine a maar-aramat a pagminas iti balitok.

Sa laeng pinanawan dagiti suspek ti lugar idi kapkapnekanda a total a napuoran ti drilling machine.

Kinuna ni Police Senior Inspector Sosimo Pablico Reyes, COP, nga iti insayangkatda a follow-up investigation, nakaalada iti statement manipud iti maysa nga Abdon Sungyo y Fernandez, Assistant Supervisor ti Drill Corporation Philippine, Incorporated, a kukua ken imatonan ti maysa nga Australian national a nainaganan Kenette Wilkes a sueldoan ti PDEP Incorporated.

Iti pannakaisurat daytoy, di pay ammo ti kinasiasino dagiti suspek agsipud ta negatibo ti resulta ti pannakaiparang dagiti retrato dagiti kameng ti NPA kadagiti saksi iti nasao a panagpuor.

Ngem kinuna ti polis nga agtultuloy ti panagimbestigada mainaig iti insidente tapno maipilaan iti kaso dagiti nagisayangkat a rebelde.#