Panagrehistro dagiti botante iti umuna a distrito ti Ilocos Sur, naisanud

VIGAN CITY – Inwaragawag ti Commission on Elections ti pannakaisanud ti agtultuloy a panagrehistro dagiti baro a botante iti umuna a distrito ti Ilocos Sur iti Hulio 11, 2011 agsipud iti maangay nga espesial nga eleksion inton Mayo 28 a pakabutosan ti puesto ti diputado a binakantean ni dati a Cong. Ronald Singson.

Sagudayen ti Resolution No. 9193 nga impromulgar ti Comelec idi Abril 14, 2011 a maisanud ti agtultuloy a rehistrasion dagiti botante iti sangapulo nga ili ken maysa a siudad a mangbukel iti umuna a distrito ti Ilocos Sur tapno “maikkan ti poll body a mangiwayat kadagiti aktibidad sakbay ken kalpasan ti espesial nga eleksion a maangay iti First Congressional District ti Ilocos Sur”.

Segun iti maysa nga opisial ti Comelec, ti listaan dagiti botante a nagbutos idi barangay elections ti masurot iti special elections. Kasta met a masurot ti mano-mano a panagbilangan dagiti butos dagiti kandidato.

Naituding ti Mayo 28 a pannakaangay ti espesial nga eleksion a pakabutosan iti diputado iti umuna a distrito ti Ilocos Sur kalpasan ti panagbakante ti puesto gapu iti pannakaikkat ni dati a Cong. Ronald Singson iti roster dagiti agilinlinteg iti Kamara maigapu iti pannakasentensiana a mabalud iti 18 a bulan iti Hong Kong gapu iti panagikutna iti droga.

Ni Vigan City Vice Ryan Singson ti pinili dagiti dadaulo ken lider ti Bileg Party, partido ni Gov. Luis “Chavit” Singson, a mangsukat ken ni dati a Cong. Ronald Singson.

Ti bise mayor ti nangitultuloy kadagiti nairugi a proyekto ti manongna bayat ti pannakabista ti kaso daytoy iti Hong Kong Court.

Kasango ni Singson ni Atty. Trandy Baterina a nangipila metten iti kandidaturana para diputado iti umuna a distrito ti probinsia.

Segun iti Comelec, sagudayen ti Seksion 8 ti RA 8189 nga awan ti maisayangkat a panagrehistro dagiti botante  iti uneg ti siam a pulo nga aldaw kasakbayan ti espesial nga eleksion.

Dagiti sumaganad dagiti ili ken maysa a siudad a masakupan ti resolusion ti poll body: Sinait, Cabugao, San Juan, Magsingal, Sto. Domingo, San Ildefonso, San Vicente, Sta. Catalina, Caoayan, Bantay, ken Vigan City.#