Panagronda iti barangay, dinawat ti provincial director kadagiti barangay officials, tanod

BANTAY, Ilocos Sur – Dinawat ti provincial director kadagiti barangay officials ken tanod ti panagrondada tapno malapdan ti insidente ti panagtakaw iti barangay a sakupda.

“…Dawatentayo ti tulong dagiti barangay officials ken tanod tapno isuda ti agronda tapno maprebentar ti panagtakaw kadagiti barangay,” kinuna ni Police Senior Supt. Eduardo Dopale bayat ti pannakiuman kenkuana ni Eugene Paet a naipatangatang iti Barangay Commando Brigada ti DWRS idi Nobiembre 5.

Daytoy ti nagbalin a reaksion ni Dopale iti naidanon kenkuana a report a ngimmato dagiti insidente ti panagtakaw kadagiti barangay.

Kabayatanna, dua pay a pagtaengan ti naireport a natakawan iti Barangay Bulag West, Bantay, Ilocos Sur idi malem ti Oktubre 27 ken iti Barangay Sagat, Sta. Cruz, Ilocos Sur idi Nobiembre 1.

Natakaw iti balay ni Felicitas Rocero y Lagambra, 73, naasawaan, residente iti Barangay Bulag West, Bantay, Ilocos Sur ti P150,000 a cash money ken assorted nga alahas.

Segun iti inbestigasion, napan binisita ni Rocero ti anakna a babai iti Barangay Bayubay, San Vicente, Ilocos Sur ket dua nga aldaw sadiay.

Naduktalan laengen ni Rocero a naporsar a naluktan ti main door ti balayna ken nakalukat ti master’s bedroom idi aggawid.

Kinuna met ti kaarruba ti biktima a kiniddawna a mangkita iti balayna nga adda nakitana nga aggatgatang iti scrap bayat ti kaawan ti biktima.

Iti Sta. Cruz, natakawan met idi agarup alas 12:45 iti malem ti Oktubre 31 ti pagtaengan ni Januel Lexter Javillonar y German, 27, empleado ti Asia Link, residente iti Barangay Sagat, Sta. Cruz ket kinasakas dagiti mannanakaw ti maysa a Toshiba laptop, maysa a Nokia N78 cellpone, maysa a Nokia 2100, maysa a company cell phone 6700C, maysa a dark brown wallet a naglaon iti personal identification card, cash money ken dadduma pay nga importante a dokumento ken 3 a Citizen watch a gold plated a mapattapatta nga agbalor iti P80,000.

Di pay nabigbig ti mannanakaw.

Idi sakbay ti barangay ken SK elections, imbilin ni Dopale ti pannakaipasdek dagiti barangay checkpoints tapno maprebentaran ti pannakaisayangkat dagiti krimen ken tapno nadalus ken natalna ti eleksion.#