Panagsakbay iti terorismo dagiti agindeg iti Northern Luzon

“AGSAKBAY, maarus pay.” Dayta ti kadawyan a pagsasao dagiti managsagana nga umili no adda dagiti dumteng a naindaklan a gannuat nga aramidenda nangruna no adda dagiti mapaspasangasangan a didigra wenno dakes a pagteng.

Adu nga umili ken agindeg iti Northern Luzon ti naalarma ken nakarikna iti panagamak iti panagwaras iti social media nangruna iti Facebook ti kopia ti Memorandum Alert a naggapu iti Office of the Assistant Chief of Unified Command Staff for Intelligence ti Armed Forces of the Philippines Northern Luzon Command (AFP NOLCOM) a nakabase sadiay Camp General Servillano Aquino, Tarlac City.

Napetsaan ti Memo Alert iti Agosto 2, 2019 a naiturong kadagiti military task forces ken intelligence groups iti Area of Responsibility ti AFP NOLCOM maipapan iti panagalertoda iti posible a panagisayangkat iti terror attack dagiti mapapati nga Islamic extremists kangrunaanna kadagiti business centers ken ayan dagiti napnuan-pakasaritaan a simbaan ti Iglesia Katolika.

Nailanad iti Memo Alert dagiti “Crusader Cities” ken “Crusader Churches” wenno lugar a posible a pakaiwayatan ti aramid iti terorismo: Laoag City, Vigan City, Manaoag (Pangasinan) ken Tuguegarao City. Naibilin ti pannakapainget ti intelligence monitoring, pannakayetnag ti direktiba para iti Red Alert Status inton Agosto 11 – 12, 2019, ken pannakaideklarar kadagiti uppat a nadakamat a lugar a “high priority targets.” Mabigbig ti kinadur-as dagiti nadakamat a lugar iti Northern Luzon, ken adu pay dagiti napnuan-kaipapanan a simbaan.

Saan a maliklikan dagiti umili iti Northern Luzon nangruna kadagiti nadakamat nga uppat a lugar gapu kadagiti nagadu a share ti Memo Alert iti Facebook ken awan ti sigud a maseknan nga opisial ti gobierno a nangkompirma wenno nangilawlawag iti kinapudno ken pakabuklan ti nai-leak a “Classified Information.”

No man saan pay a nakompirmaran ti Memo Alert, saan a maliklikan ti panagamak dagiti umili ta iti nabiit pay a naglabas ket addan dagiti napasamak a terror attack iti Pilipinas nangruna kadagiti paset ti Muslim Mindanao kas ti panagbomba iti Jolo Cathedral, kampo ti military ken dadduma pay a pagdudupudopan dagiti tattao a ti nangisayangkat ket dagiti suicide bombers a nakatayan ken nakadangran dagiti adu a biktima.

Kinompirman ti AFP NOLCOM Spokesman a pudno wenno “genuine” ti nagwaras a Memo Alert a para laeng kadagiti intelligence units, ngem nai-leak daytoy iti social media. Inlawlawagna nga uray authentic ti Memo Alert, dagiti linaonna nga inpormasion ket madama pay laeng ti validation wenno verification-da. Impakaammona pay a madaman ti pannakaimbestigar ti pannakai-leak ti Memo Alert ket madusa ti akin-aramid iti un-authorized disclosure ti classified document.

Nagduduma ti reaksion dagiti umili iti nagwaras a Memo Alert, adda dagiti nagdanag ken nakarurod. Adda dagiti nangibilang iti Memo Alert a fake news wenno palso a damag ken pinagsasawanda pay iti dakes dagiti nangi-share iti Facebook.

Ngem uray pay no adda dagiti nagdanag, adda met nasayaat a naipaay ti panagwaras ti Memo Alert ta napakaamuan dagiti tattao iti pangta ti terorismo, ken nadagdag dagiti maseknan nga opisial ken ahensia ti gobierno a nagtignay tapno masaluadan ti seguridad dagiti umili. Gapu iti Memo Alert, nakapagsaganan ti gobierno ken dagiti umili, ket no adda man dagiti grupo nga agpangpanggep iti dakes ket saanda la ketdin nga ituloy ti planoda.

Napartak ti panagtignay dagiti kameng ti Philippine National Police, AFP ken dagiti maseknan nga opisial kadagiti nadakamat a probinsia iti panagsagana ken pananglappedda iti posible a mapasamak. Napainget dagiti panagpatrulia ken panag-checkpoint dagiti polis ken soldado. Nainspeksion dagiti napnuan-pakasaritaan a simbaan, public offices, shopping malls ken dadduma pay nga establisimiento.  

No man pay saan a kas kadagiti ka-Musliman a paset ti Mindanao ti kaaduda iti Northern Luzon, ngem nagsaknapdan kadagiti dandani amin nga ili, siudad ken probinsia. Adun dagiti komunidad dagiti Muslim ken mosque kadagiti nagduduma a lugar iti Luzon nangruna kadagiti siudad ken progresibo nga ili.

Napintas ti relasion dagiti Kristiano ken Muslim ditoy Luzon ta nakappia ti panaglalangenda. Kaaduan kadagiti Muslim iti Northern Luzon ket maibilang a “law abiding citizens” a ti kangrunaan a panggepda ket agnegosio ken agbiag a nakappia gapu ta pinanawanda dagiti nariribuk a lugarda sadiay Mindanao. Ngem mabalin nga adda latta mailaok wenno maisar-ong nga addaan iti naballikog a pammati wenno ideolohia.   

Iti pannakalapped ti terorismo ket saan laeng a responsibilidad ti gobierno, nasken met ti pannakikaysa dagti pribado nga umili. Nasken ti panangsiput ken panagalerto dagiti amin nga umili kadagiti mapagduduaan a tignay dagiti tattao a posible nga agiwayat kadagiti terrorist acts ket nasken nga ireportda iti autoridad.

Idi kalman, Agosto 11, ken ita, Agosto 12 ti panagrambak dagiti Muslim ti Feast of Eid al-adha wenno Feast of Sacrifice, kas panangilagip ti Panangidaton ni Propeta Ibrahim (Abraham)  iti anakna a ni Ismael iti Dios (ni Allah para kadagiti Muslim) kas pammaneknek ti napudno a debosionna. Indeklararan ni Presidente Duterte a National Holiday iti Pilipinas ti Agosto 12 kas pannakitimpuyog ti gobierno kadagiti Pilipino a Muslim. Ita nga aldaw, adda naiballaag a pangta ti terorismo kadagiti nadur-as a lugar iti Northern Luzon. No man pay saan a masinunuo ti kinapudno dagiti impormasion a naipalaon iti Memo Alert, nasken ti panagtalinaed a kalmado, panagalerto ken panagtignay dagiti umili. Nasken pay ti panagtaklin iti Dios a kangrunaan a mangilisi kadagiti tattao iti amin a klase ti didigra ken kinadamsak. Rumbeng ti panagkamang iti Dios ta lawlawaganna ti nakulaapan a panunot dagiti terorista tapno saanda nga isayangkat ti sinasairo nga aramidda a mangisangbay ti kinadamsak. (Eden Alviar)