Panagsanay iti rice cracker making, naangay

CABUGAO, Ilocos Sur – Dagiti kameng ti 4 Ps ken Agrarian Reform Communities, kasta met dagiti out of school youth dagiti puntiria a benepisario ti basic skills training iti rice cracker making a naangay itay Marso 27, 2015.

Impalgak ni Maricar P. Lodivico, staff ti Department of Trade and Industry, a daytoy ti kaunaan nga inggannuatda a pasanay para kadagiti nadumaduma nga asosasion iti intero a probinsia.

Innayonna a naiwayat ti panagsanay tapno maluktan ti ad-adu nga oportunidad ken pagsapulan kadagiti umili ditoy.

Dinayaw pay ni Lodivico ti panangipatalged dagiti asosasion iti Cabugao iti pannakipasetda iti nasao a programa ken iti madadaan a partnership ti lokal a gobierno iti panangidaulo ni Mayor Edgardo S. Cobangbang, Jr.#