Panagseserrek manen

Ni Arlane P. Manzano-Ellorin

PANAGSESERREK manen. Tiempo manen ti panagagawa kadagiti leksion, panagbasa ken pananganag iti istoria wenno numero, panagaramid iti asaynment, panangileppas iti proyekto ken panagrepaso para iti test.

Ne-ay! Nakababain ti maibbong kunam sa!

Kasano nga’d met ti mangsaluyot iti test, kunam? Narigat, kabagis, ta uray siak a mismo idi agbasbasaak ket saanko pulos nasaluyot dagiti inted ni Ma’amko. Ketdi, kaasin’ Apo, iti kaano man, saannak a nagbalin nga ap-ap ti klase. Nakamoteak sagpaminsan iti Matematika ngem saannak met a nabalitungeg! Ti nalaka ket no kasano ti makaala iti nangatngato ngem kababaan… no napaspasnekka, mabalin a nangatngato ngem iti ekspektasion ni sir wenno ni ma’am.

Idi tiempomi aglalo iti kolehio, agduduma ti galad dagiti kakaseraak. Adda mapan iti katurodan wenno kataltalonan ti Magsaysay Village a nakaiggem kadagiti “kinaban” a libro ken notebook. Adda met kutim a kutim a dumdumngeg iti request and dedication iti FM radio bayat ti panangdumogna iti reviewer. Napasamak met dagiti dadduma nga agngatangata manipud iti sirok ti kakaykayuan. Naungtannak pay naminsan ta adda nauborko nga agtantanamitim manipud iti tuktok ti bayabas. Naminsan, adda pay nagistayan natnag ta iti ketdin tuktok ti boarding house ti naginteresanna a pagreviewan! Ket siak? Dua lawas sakbay ti test, aglalo no finals, palpalabsakon dagiti leksionmi agraman dagiti napalabas a quiz. No magagetak ken adda orasko, mapannak agbasa iti library. Wenno, sarungkarak ni ma’am ken sir iti faculty room ket damagek dagiti banag a diak unay maawatan. Namin-adu met a naggroup studykami tapno naen-enjoy ti panagiinnadal ken mairingpasmi dagiti dadduma nga aramidmi (kapades ngamin dagiti mangisursuro ti agpa-project no kasdiay nga umadanin ti Mid-term wenno Finals). Inton lawas ti exammi, agaliwaksayak metten ket palabsakto laengen dagiti leksionko. Epektibo kaniak daytoy a wagas ta addanto pay laeng gundawayko a mangsubli kadagiti leksion a diak unay masurotan.

Adu met kadagiti am-ammok ti agpatnag nga agrepaso wenno maladaw a maturog santo agriing a masapa wenno maturog a masapa ket agparbangon nga agreview. Kunada a nasidsidap kan’ ti memoriada no kastoy ti aramidenda. Ngem, naminsan a pinadasko, kabagis, nakamoteak. Nalag-an ti ulok a nageksamen ket nagistayan naitayab amin a naadalko!

Kunak, a rumbeng a suotenyo ti bagiyo no ania ti nasamsamay a wagas ti inkay’ panagreview. Ti napateg, saan a masayang dagiti pirak a gasgastuenyo iti inkay’ panagadal ta katukad dayta ti ling-et ken rigat dagiti mangipatpateg kadakayo. Kasta met nga inton makaturposkayo ket saanyonto lattan a kepkepan nga ilemlemmeng ta official transcript of recordyo. Ketdi, sigaganaskayonto met a mangisarang ti maipagpannakel a gapuanan ti kinapasnekyo.

Narigat ti ag-cramming wenno agdardaras a panagrepaso ngem no isu ti mabistoyo, ay ket agawaanyo ngarud. Ngem no kunayo a saanyon a kasapulan ti agrepaso, makaammokayo!#