Panagsukisok iti lodging house, negatibo ti resultana

SAN VICENTE, Ilocos Sur – Negatibo ti panagsukisok ti bunggoy ti Anti-Cybercrime Group a nakabase iti Camp Crame, Quezon City ti maysa a lodging house sadiay Barangay Bayubay Norte ditoy nga ili idi malem ti Nobiembre 17.

Imet ti nasao a bunggoy ti Search Warrant No. 14-24211 nga inyisio ni Judge Reynaldo A. Alhambra, acting executive judge ti RTC Branch 53, Manila a napetsaan iti Nobiembre 13, 2014 maikontra iti maysa a John Chan, mapapati nga aggigian iti Outbase Lodging House and Swimming Pool a masarakan iti nadakamat a barangay.

Mapapati nga adda iti ikut ti nasao a tao wenno dagiti okupante dagiti devices, wenno gadgets a maaramat iti telephone fraud scheme, maysa a panaglabsing iti Section 8 iti RA 8484.

Ngem naggawid nga ima-ima dagiti nagsukisok agsipud ta awan ti nasukainanda a device wenno gadgets iti nasao a lodging house.#