Footer

Panagtakaw iti 2 barangay, maymaysa a grupo ti nagisayangkat?

MAGSINGAL, Ilocos Sur – Maymaysa a grupo ti mannanakaw ti nagisayangkat iti panagtakaw iti balay ti maysa a balikbayan iti  Sitio Ermita West, Barangay San Sebastian, San Vicente, Ilocos Sur ken iti balay ti maysa a negosiante iti Barangay Sta. Monica ditoy nga ili?

Iti interbiona iti maysa a lokal a radio station, kinuna ni COP Roy Rafanan a patienna a maymaysa ti grupo a nagtakaw iti dua a barangay agsipud ta agkaasping ti estilo ti pannakaserrek dagiti dua a pagtaengan ken maymaysa ti kita ti getaway vehicle nga inaramat dagiti mannanakaw iti panaglibasda.

Maysa nga aldaw kalpasan ti pannakatiliw iti Vigan City ti tallo a suspek iti panagtakaw iti balay ti balikbayan sadiay Sitio  Ermita West, Barangay San Sebastian, San Vicente, Ilocos Sur, naireport idi agsapa ti Pebrero 8 ti pannakaserrek ti balay ti maysa a negosiante ken dati a sangguniang bayan member sadiay Barangay Sta. Monica ditoy nga ili a nakatakawan ti kuarta, alikamen ken dadduma pay a sanikua ti akimbalay.

Inreport ni Sta. Monica Barangay Captain, Agustin Pichay a natakawan ti balay ni Henedine Corpuz y Unana, 55, naasawaan, negosiante ken residente iti nadakamat a barangay.

Segun iti inisial nga inbestigasion dagiti polis, idi agarup alas 5:00 ti bigat ti Pebrero 8, simmangpet iti balay ti biktima ni Willy Arellano y Tacuban, 50, naasawaan, drayber ken residente iti Barangay Manzante, Magsingal ket idi linuktanna ti silaw, nakitana a nakalukat ti kangrunaan a ridaw.

Idi simrek dagiti nagresponde a polis ken ti kabsat ti biktima, nakitada laengen a naiwarawara dagiti alikamen iti uneg ken nakalukat amin a kabinet.

Karaman kadagiti natakaw ti maysa a flat screen TV nga agbalor iti P25,000.00, Rado watch nga agpateg iti $350, lisensiado nga Smith and Wesson 357, P57,000.00 cash, 2 a military medals, bullet proof vest ken alahas nga agpateg iti P5,000.00.

Nagyaman ni Corpuz ta adda iti Manila idi naserrek ti balayna ta amangan no naisagmak idi mapasamak ti panagtakaw.

Mapapati a maysa a nalabaga a F150 van ti nagluganan dagiti suspek iti panaglibasda nga agturong iti saan ammo a direksion.

Iti panagtakaw iti Barangay San Sebastian, San Vicente, mapapati a naglugan met dagiti mannanakaw iti nalabaga a getaway vehicle idi naglibasda.#