Panagtakaw iti maysa a kompania, inside job?

BANTAY, Ilocos Sur – Inside job?

Daytoy ti maysa nga anggulo a kitkitaen dagiti inbestigador mainaig iti panagtakaw iti maysa a kompania a masarakan iti Barangay Sinabaan ditoy nga ili idi rabii ti Abril 21.

Rimsua daytoy a suspetsa kalpasan a limtuad iti footage ti CCTV a naikapet iti uneg ti  Laoag Solid 8 Corporation a naiddep ti switch daytoy sumagmamano a minutos kalpasan ti iseserrek ti maysa nga stay-in nga empleado  iti kuartona.

Ngem saan a nailanad iti report no napagsaludsodan ni Arjay Maligsa y Delos Santos, 30, baro, BS Electronics and Communication Engineering graduate ken residente iti Bimmanga, Currimao, Ilocos Norte mainaig iti pannakaiddep ti CCTV a pangmonitor iti vault ti establisimiento.

Iti inisial a panagimbestiga dagiti polis, indeposito ni Lovelyn Palencia y Salvador, 28, awanan asawa, ken residente iti Barangay 4, San Bartolome, San Nicolas, Ilocos Norte, ti P517,370.00 cash iti vault idi agarup 6:02 ti malem ti Abril 20.

Mapapati a tinulbekan ti accounting clerk ti ruar ti vault, ngem saanna nga inserra babaen ti combination lock ti uneg sana imbati ti tulbek iti drawerna kas nakairuamanda.

Idi sumrek ni Palencia idi agsapa ti Abril ti 21, naduktalanna laengen a naporsar a naluktan ti likud a ridaw ti opisinada.

Idi sinukimat ni Palencia ti vault, nasukalanna a nakatulbek pay laeng ngem awanen ti kuarta iti uneg.

Iti panagimbestiga dagiti polis, naammuan a dua nga agdan ti naipasanggir iti stock room a nakakonektar iti opis, kasta met nga adda exit door a pakastrekan iti bubongan ti opisina ket nadiskonektar ti switch ti CCTV.

Agtultuloy ti panagimbestiga dagiti polis mainaig iti daytoy a panagtakaw.

Kabayatanna, gapu iti sugal, dakkel a kantidad a naikabil iti kaha ti kompania ti nakaud ti maysa nga empleado.

Inannugot ni Florencio Rapin Pisalbo, 39, naasawaan, ken residente iti Barangay Guimod, Bantay, Ilocos Sur nga isu ti nangkurimes iti cash money a naikabil iti kaha nga agdagup iti P380,000.00.

Mapapati a naburbor ni Rapin ti kuarta gapu iti sugal.

Mismo a ni Jenelyn Chan y Gorre, 46, naasawaan, manedier/agtagikua iti Western Union Money Transfer ken M.J. Pawnshop Co., Cabugao Branch a masarakan iti Barangay Rizal, ditoy nga ili, ken residente iti Barangay Pantay Daya, Vigan City, ti nangireport iti polis ti Cabugao mainaig iti napukaw a kuarta a naikabil iti vault.

Segun ken ni Chan, idi nagimbentario idi malem ti Abril 17, nasukalanna a P6,213.00 laengen ti kuarta a linaon ti vault idinto a nakadulin ditoy ti P380,000.00.

Dagus a kinumpronto ni Chan dagiti empleadona a makastrek iti uneg ti vault a pakairamanan ni Rapin ket inadmitir daytoy a nakaudna ti kuarta gapu iti pannaki-sugalna.#