Panagtakaw iti motorsiklo agraira manen

STA. CRUZ, Ilocos Sur – Tallo a motorsiklo ti naireport iti polis a natakaw iti nagsisina nga aldaw sadiay Candon City, Cervantes ken Sta. Maria, Ilocos Sur.

Dua kadagitoy ti narekobre dagiti polis ket naisublida met laeng kadagiti akinkukua.

Iti reportda iti Police Provincial Office,  impakaammo ti polis-Sta. Cruz a narekobreda sadiay Barangay Calongbuyan, Balaoan, La Union ti maysa a Honda Beat single motorcycle a nairehistro ken ni Sheena May O. Gaceta, residente iti Barangay San Antonio, Candon City nga intaray dagiti mannanakaw bayat a nakaparking iti sanguanan ti balayda idi rabii ti Hulio 7.

Kagiddan daytoy, tiniliw dagiti polis ni Jaime Obiacoro y Ordinado, 32, naasawaan, mekaniko, ken residente iti Poblacion East, Sta. Cruz, Ilocos Sur a mapapati a nakaisaldaan ti motorsiklo iti P6,000.00 babaen ti tulong ti maysa a Michael Javillonar a taga-Barangay Turod, Sta. Cruz, Ilocos Sur.

Insayangkat dagiti polis-Sta. Cruz ti operasion kalpasan a nakaawatda iti impormasion a nakita ti nasao a motorsiklo iti area of responsibilityda a nagresulta iti pannakatiliw ni Obiacoro.

Kinuyog ni Obiacoro dagiti polis a nagturong iti Barangay Calongbuyan a nakarekoberan ti natakaw a motorsiklo.

Napintaanen iti nangisit ti motorsiklo ken naikkaten dagiti flarings ken nakuskosanen ti numero ti chassis/makina daytoy.

Kabayatanna, narekobre met dagiti polis-Sta. Maria ti maysa a Honda TMX idi Hulio 16, dua nga aldaw kalpasan ti pannakatakawna iti igid ti kalsada iti asideg ti balay ti maysa a konsehal sadiay Barangay Poblacion Sur.

Inreport ni Romeo Pader, Jr., y Decano, 28, naasawaan, ken residente iti Barangay Pang-ot, Pilar, Abra a natakaw ti motorsiklona nga imparkingna iti igid ti dalan ti Barangay Poblacion Sur, Sta. Maria, Ilocos Sur idi agarup 7:00 ti rabii ti Hulio 14 bayat a binisitana dagiti kakabagianna.

Iti follow-up investigation nga inwayat dagiti polis-Sta. Maria, natuntonanda ti motorsiklo a naabandonar iti kataltalonan a kukua ti maysa a Francisca Domingo iti isu met la a barangay idi agarup 9:30 ti bigat ti Hulio 16.

Naisubli ti motorsiklo ken ni Pader kalpasan nga impakitana dagiti dokumento nga isu ti agtagikua iti lugan.

Saan pay nga ammo ti kinasiasino dagiti suspek a nangitaray iti lugan.

Iti sabali a damag, saan pay a narekobre dagiti polis-Cervantes ti motorsiklo a natakaw sadiay Sitio Guitlangan, Barangay Comillas North, Cervantes idi malem ti Hulio 14.

Segun iti report, pinanawan ni Jerry Sapalong y Panaden, 23, baro, ken residente iti Sitio Bao-angan, Barangay Comillas North, Cervantes, Ilocos Sur, ti Honda TMX 155 a motorsiklona idi agarup 7:45 ti malem ti nadakamat a petsa ket napan nagdigos iti karayan ti Guitlangan.

Awanen ti motorsiklo iti nangiparkinganna idi nagsubli ni Sapalong.

Nagsawar dagiti polis ngem saandan a nabirokan ti motorsiklo.

Nangipatulodda metten iti flash alarm kadagiti kaparangetda a police stations para iti posible a pannakarekobre ti motorsiklo.#