Panagtakaw iti pagtagilakuan, nairekord ti CCTV

VIGAN CITY – Nupay nagballigi dagiti suspek a nangkurimes iti naglakuan ti maysa a pasdek-negosio ditoy siudad, nairekord ti closed circuit television ti insidente a posible a pakabigbigan ken pakatiliwanda.

Iti pulong ni Jonalyn Parada y dela Cruz, 31, naasawaan, officer in charge iti Watch Central Store a masarakan iti Plaza Maestro, idi agarup 11:00 ti bigat ti Marso 29, simrek iti nasao a pagtagilakuan ti uppat a lallaki ket nagpammarangda a kustomer.

Segun iti nairekord iti CCTV, kabayatan ti panangiyadayo ti maysa kadagiti suspek iti atension ti biktima, kinurimes dagiti kakaduana ti kuarta a naikabil iti drawer nga agdagup amin iti P2,500.00.

Iti pannakaisurat daytoy, madama ti panagimbestiga ti kapolisan iti kinaasino dagiti suspek.#