Footer

Panagtakaw iti restaurant, di napasamak?

STA. CRUZ, Ilocos Sur – Awan ti napasamak a panagtakaw iti maysa a restaurant sadiay Barangay Dili, ditoy nga ili idi parbangon ti Hulio 21?

Daytoy ti anggulo a kitkitaen dagiti inbestigador kalpasan a nangisayangkatda iti re-enactment ken follow-up investigation iti nakapasamakan ti mapapati a robbery.

Idi agarup 2:40 ti parbangon ti nadakamat a petsa, nakaawat ti police station ditoy iti text message a natakawan ti Viernes Restaurant a kukua ni Virginia Del Rosario y Abat, 29, naasawaan, ken residente iti nadakamat a barangay, iti kuarta ken alahas.

Segun iti bumalay, napuotanda ti pannakaserrek ti balayda idi agarup 1:30 ti parbangon ket inarmaranda ti bagida iti bamboo stick ngem pinaturongan ida ti di nabigbig a mannanakaw iti paltog sana innala ti clutch bag a naglaon iti P60,000.00, maysa a 24-carat a bracelet ken kuentas.

Segun iti biktima, naglibas ti mannanakaw iti likud a ridaw.

Mapapati a kinalay-at ti mannanakaw a nagkallugong iti bull cap, nakamaskara, nakaaruat iti diaket ken pantalon a maong, ti diding iti asideg ti kusina sa simrek iti bassit a giwang iti nagbaetan ti diding ken ti bubong.

Ngem iti follow-up investigation ken reenactment nga insayangkat dagiti polis iti nakapasamakan ti mapapati a panagtakaw, nakunada a narigat a makastrek ti mannanakaw iti giwang iti nagbaetan ti diding ken iti atep agsipud iti kinakipetna.

Kinuna pay dagiti inbestigador nga awan ti ebidensia ti pitak wenno sabali pay a pagilasinan a kimmalay-at ti suspek iti diding idinto a kapitakan ti aglawlaw ti nakapasamakan ti panagtakaw ken kas maibatay iti statement ti akinkukua a sakasaka ti suspek.

Limtuad pay a saan a nagargaraw ti sapot ti lawwalawa iti atep a simrekan ti suspek ken ti rugit iti tuktok ti diding agraman ti tapok iti ngato ti kabinet a posible a bimmabaan ti suspek iti iseserrekna iti kuarto kas ipakita dagiti ima ken buok ti tao a nangiwayat iti reenactment iti mapapati a panagtakaw.

Naammuan pay iti inbestigasion a pagbayad koma da Del Rosario ti kuarta iti sales agent nga agkolekta iti dayta nga aldaw.#