Footer

Panagtakaw ti motibo ti Lutong slay: polis

CERVANTES, Ilocos Sur – Panagtakaw ken homisidio ti motibo ti pannakapapatay ti maysa a negosiante sadiay Barangay Tam-awan ditoy nga ili idi agsapa ti Oktubre 20.

Daytoy ti kinuna ti kapolisan ditoy kalpasan a kinasuanda iti theft ken homicide da Jackylyn Gayadan, Jose Ladyong ken John Does iti opisina ti provincial prosecutor’s Vigan City gapu iti pannakapapatay ni Guillermo Lutong y Tanong, 58, iti nadakamat a petsa.

Nagresulta ti follow-up investigation dagiti polis ti Cervantes iti pannakabigbig ni Ladyong, natibo iti Kalinga ken agdama a kalib-in ni Jackylyn Gayadan, dati nga asawa ni Lutong, maysa a negosiante.

Ur-urayen ni Lutong ti pagpaw-itanna a utility van nga agpa-Bontoc, Mountain Province iti abaga ti kalsada iti asideg ti balayna idi kellaat a nagparang ti sumurok-kumu-rang lima a lalaki sada inulod ti biktima nga impatengnga iti kalsada.

Nupay nabaelan ni Lutong ti rimmuk-at ken nagtaray, kinamat dagiti suspek ket maysa kadakuada ti nangpaltog iti biktima a nakatiruan ti makannigid a likud ti siket ken makannawan nga akinngato a pangana a puon ti nakatayanna a dagus.

Immuneg dagiti dadduma a suspek iti balay ti biktima, pinaturonganda iti paltog ni Josephine Dominguez, kalib-in the biktima, sada simrek iti kuarto ken innala ti clutch bag a naglaon iti sumurok-kumurang a P300,000.00.

Nakarekobre dagiti polis iti crime scene iti dua a naiputok a cartridge case a mapapati a naggapu iti caliber 9mm pistol.

Kinuna ti polis a naisaganadan dagiti apidabit dagiti saksi ken complainant kasta met a kiniddawdan iti Crime Laboratory Office iti computerized facialo composite para iti posible a pannakabigbig dagiti sabali pay a suspek. (Tawid News)