Footer

Panagtallugod

Pinadasmo kadin a paliiwen ti kabalio kabayatan ti panagluganmo iti kalesa a guyodna? Simmiplot kadi iti panunotmo no ania ti riknana nga agguyguyod iti kalesa iti agmalmalem? Wenno napanunotmo kadi no ania ti riknana kabayatan a guyguyodenna ti kalesa a nagluganam?

Iti gagangay a panawen, nalabit a saanmo a mapanunot ti rason no ania ti gapu a sitatallugod ti kabalio nga agguyod iti kalesa ti amona. Ta apay, dayta laeng kadin aya ti kaikarian ti kabalio iti daytoy a lubong?

No isipen a nalaing, adda la ketdi kangrunaaan a rason ti kabalio nga agtungpal iti amona, a nasken a guyodenna ti kalesa a napno kadagiti pasahero.

Naimbag no dakkel ti panagpuspuso ti amona, a no malemen ket singkilanna iti tuyo wenno saan, adda labayanna iti tagapulot ti nagango a mais a kanenna. Ngem no naranaanna ti amo a daydiay laeng bagina ti ammona, ala, anusannan a pagbiag ti ruot wenno naangrag no di man nagango a kayo ti mais. Ania pay aya ti mabalinanna? Saan met ngarud a makareklamo iti amona. Amangan no masaktan pay.

Ngem subliantayo ti topiko. Ania aya ti rason no apay a guyoden ti kabalio ti kalesa? Isu daytoy ti aw-awaganda iti panagtallugod. Iti English, awaganda daytoy iti commitment.

Ta ania ngamin aya daytoy a panagtallugod? Ania ti kaipapananna iti biag? Ania ti maitedna para iti panagrang-ay ti maysa a tao?

Commitment is the door to achievement. Daytoy a panagtallugod ti ridaw iti panagballigi, panagdur-as ken pannakagteng iti ingpen ti biag.

No awan daytoy a panagtallugod, saan nga aglukat ti lubong kenka. Ta sadino koma ti serkam? Sumrekka iti likud a ridaw a kasla naiyesmagel? Wenno sumrekka iti tawa a kas iti mannanakaw?

 Mabilbilang ti mangaramid kadagitoy a sumrekan. Isu a ti panangipaset iti bagi a sitatallugod ti kakaisuna a sumrekan iti panagballigi, panagdur-as, ken pannakaragpat iti ingpen. Iti amin a puso ken rikna, iti amin a kanito ken bileg.

Subliantayo ti kabalio. Adda kenkuana dayta a konsentrasion ken dedikasion iti aramidna.  Adda dagitoy met laeng a kababalin iti tao a sitatallugod kadagiti aramidna. Kastoy a tao ti makunkuna a silulukat nga agnanayon ti ridaw ti balligi kenkuana.

Intay man padasen a taldiapan dagiti soldado. Apay a situtulok dagitoy a soldado a sumaranget iti pagbabakalan idinto nga  ammoda nga iti maminsan laeng a panagbiddut wenno saanda a panagannad, posible ti inda pannakalib-at wenno awan ti gasatda ket sigurado  a maulila ti baket ken dagiti ingungotenda nga annak. Kasta met kadagiti baro a soldado, ulilaenda dagiti nagannak kadakuada ken dagiti kakabsatda.  Adda iti tanem ti maysa a saka dagitoy a soldado no labsen ti agsao. Ngem apay a sitatallugodda?

Itoy a punto, makitatayo ti kinatallugod dagiti soldado iti propesionda. Adda kadakuada ti nakapinpintek a determinasion ken dedikasion. Kuna dagiti Tagalog, buo ang loob. Kasta met dagiti kabalio nga agguyguyod kadagiti kalesa.

Ngarud, napateg la unay a tagipatgen (values) ti panagtallugod wenno commitment iti biag. Kadagiti dadduma a saan a natallugod, nakalaklakada a maibalat wenno madaleb iti dana ti biag. Salloy.  Ngamin, awananda iti tibker-pakinakem ken determinasion a mangragpat iti gamgamgamenda iti biag, awananda iti pagsammakedan nga ingpen (goal) a kayatda a ragpaten. Nalakada a maidaleb.

Kadagiti saan a sitatallugod, agpatinggada la ditan. Saanda a kayaten ti bumangon.  Pagtungpalanna, ad-adda a saanda a masipar ti lawag ti namnama. Iti kanito a dumteng kadakuada ti sallukob ti sipnget, ad-addan a maibuyogda iti angin ti kinaawan. Isuda dagiti makuna nga umili a saan a produktibo iti pamiliada no di man iti gimong. Itoy a punto ti pannakadaleb, umapon kadakuada ti makailuod a mentalidad.

Kadagiti dadduma, iti pannakadalebda, sumrekda iti mentalidad ti jueteng wenno lotto mentality. Ania ti makunkuna a jueteng ken lotto mentality? Daytoy ti makunkuna nga instant millionaire. Daydiay kayatna ti bumaknang a dagus a saan a nga agrigat. Instant baknang. Ngem adda aya agin-indayon iti ngato a saan a naggapu iti baba?

Dagiti billionario ket addaanda iti commitment iti kayatda a ragpaten iti biag (goal) iti amin a puso ken riknada, iti amin a bileg ken pigsada, iti amin a sirib ken ayatda. Dagita a kualipikasion ti mangkulokol no di man mangiduron kadakuada iti nakalukat a ridaw tapno nalaklakada a sumrek iti kapanagan ti balligi.

Ngem no awan kenka daytoy panagtallugod, sadino ngarud ti papanam ket awan met ti makunkuna a direksionmo? Ngarud, kaska la daytay nabalang nga abalang nga agkatangkatang a dina ammo no sadino ti sumrekanna. Ta ania koma ti sumrekanna a ridaw ket siririkep met? Siririkep kunatayo ta awanan ngarud iti commitment iti biag isu a nakarikep kenkuana ti ridaw ti balligi.

Masansan no kua a masaludsod: ania aya ti kayatmo a ragpaten iti biag? Ditoyen a sumrek dayta a goal. No nakaiset ti goal, wenno addan goal wenno ingpem, ditoy metten a sumrek dayta makunkuna a commitment wenno panagtallugod.  Tapno makuna a namsek ken natibker dayta a commitment, nasken ngarud ti dedikasion ken determinasion ken buyogam metten iti kararag. Nabileg la unay ti kararag a tarabay ti determinasion ken dedikasion. Uray saan nga iparang kadagiti tao ti inka panagkararag, umanayen dayta panagtanamitim iti naulimek kabayatan a kasaom ti Mannakabalin a Dios.

Kadagiti testimonia dagiti nagballigi iti biag, adda latta dayta maisapit a panangawat iti bendision ti Namarsua wenno sitatallugod a panagtamed iti Namarsua kabayatan ti panangragpat iti gungun-oden iti biag. Adda pay dagiti mangibaga nga awanen ti nabatbati a tibker ken salbabidada nga umaddang iti nakadalebanda no di laeng ti kararag. Napateg unay daytoy a kabuyog iti aramid. Sitatallugod. Ridaw ti balligi.#