Latest News: Panagusar iti biblioteka uray iti panawen iti moderno a teknolohia, awis dagiti librarian | Tawid News Magazine - Weekly Ilocos News 📰

Panagusar iti biblioteka uray iti panawen iti moderno a teknolohia, awis dagiti librarian

VIGAN CITY — Adda latta pagsayaatan nga ipaay ti personal a panagbasa iti libro ken dadduma pay a babasaen kadagiti mismo a biblioteka wenno library ta maikkan ti mangbasa iti personal a pannakilangen iti basbasaenna ken adu pay laeng dagiti impormasion ken adal a saan a maadaw iti internet wenno social media.

Dayta ti bugas ti mensahe dagiti dua a librarian iti Ilocos Sur Provincial Library iti pannakiumanda kadagiti kameng ti media iti naangay a Dap-ayan Media Forum iti opisina ti Philippine Information Agency sadiay Provincial Capitol iti daytoy a siudad idi malem ti Nobiembre 7, 2019.

Nasangaili iti Dap-ayan Media Forum dagiti agpapaay iti Provincial Library a da Apple Rose Rebuca ken Mary Ann Amano. Inaklon dagiti dua a librarian nga iti agdama a panawen ket dakkel ti bimmassitan dagiti mapmapan nga estudiante nga agbasa wenno ag-research iti library gapu ti panagsaknapen ti panagusar ti internet iti computer nga uray sadino a lugar ket mabalin ti agala ti impormasion no adda la ket signal ken connection.

Impakaammoda nga adda met latta dagiti mapan agadal ken ag-research iti Provincial Library ta adda metten electronic library ti biblioteka kalaksidan pay dagiti adu a libro a mabalin a personal a basaen. Inlawlawagna nga adu dagiti mapmapan ag-research iti Provincial Library dagiti agsuksukisok maipapan kadagiti pakasaritaan ti Kailokuan ken ti siudad ti Vigan, karamanen dagiti prominente nga Ilokano ken ganggannaet nga adda pakainaiganna iti nabaknang ken namaris a pakasaritaan ken kultura iti probinsia.

Impaganetgetda nga iti laksid ti kinamodernon ti teknolohia iti panagadaw iti impormasion ket adu latta dagiti banag nga awan iti internet a mabirokan kadagiti biblioteka. Inawisna dagiti taga-Ilocos Sur ken uray dagiti maisar-ong iti Vigan City ti panagbasa ken panag-research-da iti Provincial Library ta adu dagiti nagduduma a libro ken babasaen a masarakan iti dayta a biblioteka nga awan iti computer internet.

Indariragda kadagiti ubbing ken agtutubo a padasenda ti agbasa kadagiti libro ken nagduduma a babasaen ta naidumduma dayta a kapadasan ta maikkanda iti gundaway a personal a makaiggem kadagiti basaenda. ●