Panagwaras 10,000 tonelada a nagubo a lana iti baybay, nakontrol

SAN FERNANDO CITY – Nakontrol met laengen ti panagubo ti lana iti pipeline nga agturong iti depot ti maysa nga oil company, segun iti provincial director ditoy probinsia.

Iti reportna ken ni Chief Supt. Franklin Jesus B. Bucayu, regional director ti Police Regional Office 1 (PRO1), kinuna ni La Union police director Senior Supt. Ramon O. Purugganan a nakontrolen ti panagubo ti lana manipud iti tubo nga agturong iti depot ti Chevron Phils Inc.

Kinuna ni Purugganan nga iti agarup 10:30 ti bigat idi Pebrero 21, simmanglad ti Marine Tanker (M/T) Panglao Island iti Pier 1 iti Poro Point ditoy a siudad ket rinugianna ti agiyalis iti automotive diesel oil (ADO) iti tubo nga agturong iti nasao a depot ti kompania ti lana ngem idi agarup alas 2:30 ti malem, naduktalan ni Captain Hinampas, skipper ti nasao a lugan, ti panagubo ti lana ket pinasardengna ti proseso.

Innayon ni Hinampas a nakaiyalisen ti tanker iti 443.922 metric tons iti lana iti Chevron depot idi pinaisardengna ti proseso.

Mapattapatta nga aganay 10,000 a litro ti diesel ti naggubo iti baybay a puon ti nakaikabilan ti insidente iti category Tier 1 Spill.

Nupay kasta, kinuna ni Captain George Ursabia, commander ti Philippine Coast Guard District Northern Luzon, a napasardengen ti ubo ket saanen a makaalarma ti panagwaras ti diesel oil iti kabaybayan a masakupan ti Barangay Poro ditoy siudad.

Siniguro pay ni Ursabia nga iti agmalem, madalusanen ti kabaybayan a nagwarasan ti diesel oil ket awanen ti pagamkan dagiti agindeg iti igid ti baybay ti Poro Point  agsipud ta agpukawton daytoy iti uneg ti sumagmamano nga oras.

Kabayatanna, kinuna ni Purugganan nga agtuloy ti panangipaay dagiti polis iti tulong ken pannakatagiben ti talna iti nasao a lugar.#