Panagyaman iti ayat ti maysa nga ina

Ni nanangko ay-ayatennak/ ub-ubbaennak no masakitak/ barukongnak pagsadsadagak/ ta kayatna nga agbiagak/ Naragsak ti aldaw ni nanangko/ Nayanak iti bulan ti Mayo/ Panaglalangto ti kaykayo ken sabsabong nga adu…

Tunggal Mayo a panangrambak ti sangalubongan iti Bulan dagiti Inna kas panangbigbig iti natan-ok a sakripisioda kadagiti annak ken pamiliada, ket agungar latta iti lagipko daytoy a kanta a duaya wenno sonata a pangpatpaturog daydi pimmusayen nga inami a Feliza kaniak ken dagiti naud-udi pay nga adingmi.

Nayat-ataday la unay ti kanta ta nairana a nayanak ken pimmusay pay ti inami iti Mayo. No sumangbay daytoy a bulan, malaglagipko latta daydi inami – ti nasudi a panagayatda kadakami a walo nga annakda iti daydi immun-una a pimmusay nga amami a ni Daniel Sr.; ti panangpadakkelda kadakami kadagiti nadiosan ken nasayaat a panursuro; ti panangtaraon ken panangpaadalda kadakami iti bukodda a nagling-etan; ti panangisagutda kadakami iti nangat-ato nga adal tapno matubay ken tumanor kami nga annakda a nasaysayaat a tao.

Malaglagipko latta dagiti adu a sakripisio, tuok ken rigat nga imbaklay ti inami idi immun-una a naulila kami iti ama tapno maituloy ken maileppasmi ti panagadalmi ta para kadakuada ti edukasion ti agnanayon ken kapatgan a gameng a maipatawidda kadakami nga annakda.

Uray itan ta nataenganakon ken addan bukodko a pamilia, sumken latta iti nakemko dagiti nabalitokan nga adal nga intukitda ken ti amami iti panunotko a nagbalinen a silaw ken bagnosko kabayatan ti agtultuloy a panagdaliasatko iti daytoy a biag. Malaglagipko latta ti kinagaget ken kinasalukag ti inami, nga awan ti sinamirna a rigat tapno maisakadna ti panagbiag ken panagadalmi nga agkakabsat nga addaan-dignidad. Dagitoy ti pagwadan ken ar-aramidek ita iti pamiliak a kayatko met a tuladento ti anakmi nga agassawa no agbalinto metten nga ama ti bukodna a pamilia. Ti awan-kaaspingna nga ayat nga impaay ti inami kadakami nga agkakabsat ket isu met ti pammateg nga iparpariknak iti kakaisuna nga anakmi nga agassawa.

Malaglagip latta dagiti narabaw a pagubbogan iti ragsak ti inami, ti panangipanakkelna kadakami nga annakda kadagiti simple wenno babassit a balligimi kas ti panagturposmi iti kolehio ken kaadda dagiti pagtrabahuanmi. Sumken latta iti lagipko ti ayat ken isem daydi inami no adda dagiti mabasana a saritak wenno artikulo a maipablaak iti magasin ken pagiwarnak no maammauanna a mairamraman latta iti naganko ti apiliedona nga “Aquino” idi balasang a pagubbogan ti ragsakna a kasla napatpateg pay ngem iti kuarta ken material a banag a maisagut kenkuana.

Napateg unay dagiti inna ken amma ta no awanda, awan met ti biag. Awan ti naipasngay a tao nga awan iti inana, uray iti agdaman a moderno a panawen nga addan dagiti “surrogate mother.”  

Kalaksidan dagiti adun a pasamak nga adda dagiti nagannak nga isuda a mismo ti mangirurumen kadagiti annakda, ad-adu latta dagiti inna ken amma a mangikagkagumaan ti pagsayaatan dagiti annakda.

Tunggal inanak ket adda latta dagiti nasayaat a padas ken pakasaritaanda iti inada. Iti na-Kristianuan a lubong, ti katan-okan nga Ina ket ni Santa Maria nga Ina ni Apo Jesucristo. Kas ina ti timmao a Dios babaen ti Espiritu Santo, naindaklan ti sakripisio ni Santa Maria manipud iti pannakainaw, pannakaipasngay, panagdakkel ken ipupusay iti krus ti Anakna.

Idi nagbaklay ti Anakna a ni Apo Jesus iti krus iti Bantay Calvario, ken idi nagtutuok ken nailansa iti krus ket adda ni Santa Maria a nangsaksi iti panagrigrigat agingga iti pannakapugsat ti angesna.

Iti Iglesia Katolika, marambakan tunggal Baro a Tawen wenno Enero 1 ti “Kinaina ni Maria” wenno “Motherhood of Mary” kas panangbigbig iti natan-ok nga akemna kas Ina ti timmao a Dios.

Maramrambakan met iti sangalubongan ti maikadua a Domingo ti Mayo kas Mother’s Day, ken ti intero a Mayo kas bulan dagiti amin nga inna kas panangbigbig kadakuada kadagiti naindaklan nga akem ken sakripisioda kadagiti annakda tapno maipasngay, dumakkel ken tumanorda a namnama ken sanggir ti pamilia ken pagilian.

Rambakan dagiti adu nga annak ti Mayo a nakarikna ken nakapadas ti aglaplapusanan a pammateg dagiti inada manipud kinaubing agingga iti panagdakkel ken panagbalinda a nataengan.

Mailagip iti daytoy a bulan ti saan a magatadan nga ayat ken sakripisio dagiti inna para kadagiti annakda manipud pannakainaw ti pitik ti biag iti tianda agingga iti ipasngayda ti maladaga ket dakkel a sakripisio ken risgo ta ipustada ti biagda. Adunto pay a tuok ken rigat ti ibaklayda iti panagdakkel ti maladaga agingga a kabaelanna ti tumakder, magna ken agbiag babaen kadagiti bukodna a saka.

Iti pamilia dagiti kaaduan a Pilipino, iyanninawna ti kinasinged ti relasion dagiti inna kadagiti annakda manipud iti pannakayanakda. Dagiti inna ti nakarkaro a maringgoran, atagenda dagiti annakda iti agpatnag, pasusuenda iti barukongda ket no agsakit ti ubing, isuda ti ad-adda a madanagan ken matuokan. Dayta ti gapu a kaaduanna a dagiti annak ket nasingsingedda kadagiti innada uray no adda met dagiti ammada.

Ita a Bulan dagiti Inna, nagasat dagiti annak a sibibiag wenno adda pay dagiti innada ta maipariknada ti ayat ken panagyamanda kadagiti innada. Ngem kadagiti awananen wenno pimmusayen dagiti innada, maibiag laengen dagiti lagip ti napalabas iti panunotda, ken ti panagyamanda babaen ti naimpapusuan a kararag iti Dios ta dagiti kararua dagiti innada ket aginanadan ken makipagtaengdan iti sidong ti Ama a Namarsua, ken iti denna ni Santa Maria a katan-okan nga Ina.