Panangamiris iti kaipapanan ti Semana Santa

NANGRUGIN idi kalman, Domingo Ramos, ti panangngilin dagiti Katoliko iti sangalubongan, iti Semana Santa, a maigibus inton Domingo Panagungar, makalawas a pananglagip iti panagtutuok ken ipapatay iti krus ni Apo Jesucristo tapno subbotenna iti basol ti sangalubongan.

Naisangsangayan ti pannakangilin ti Semana Santa iti
Pilipinas kas kangrunaan a pagilian dagiti Kristiano Katoliko iti Asia ta kalaksidan kadagiti narelihiosuan nga aramid a mayataday iti panursuro ti Simbaan kas kadagiti Misa, panangiwagwag iti ramos,  panangbuggo iti dapan,  panagdengngeg kadagiti pito a maudi a balikas, prusision, panagbihilar ken dadduma pay nga aramid, ket adda pay dagiti gannuat a maikontra iti adal ti pammati – dagiti  maisaysayangkat a panagpenitensia kas wagas ti panagpakawan iti basol.

Mailabsing iti panursuro ti Simbaan Katolika ti panangdangran iti bagi ti tao ta maibilang ti bagi a nasagraduan kas templo ti Espi-
ritu Santo, ket awan ti karbengan ti maysa a tao a mangdangran iti bukodna a bagi wenno bagi ti padana a tao.

Iti nagduduma a paset ti Pilipinas no Semana Santa nangruna iti Biernes Santo ket adda latta dagiti makitkita kadagiti kalsada a magmagna nga agawit iti krus. Adda pay dagiti mangsapsaplit iti bukodda a bagi, ken adda pay dagiti agpaibitin wenno agpailansa iti krus.

Nalatak tunggal Semana Santa ti Brgy. Cutud, San Fernando City, Pampanga, gapu ti kaadu dagiti agpenpenitensia, ken dagiti agpapailansa iti krus iti dayta a disso. Daydaywen dayta a lugar dagiti adu a turista tapno saksianda ti panagpailansa iti krus dagiti agpenitensia.

Supiaten dagiti lider ti Simbaan Katolika dayta a wagas ti panagpenitensia ta maikontra iti Pammati. Nalaokanen iti komersia-
lismo ta nagbalinen nga atraksion dagiti turista ti panagpailansa iti krus dagiti agpenpenitensia.

Iyad-adal ti Simbaan Katolika dagiti tallo a kangrunaan nga aramiden iti panangngilin iti Kuaresma nangruna iti Semana Santa – napasnek a panagkararag, panagayunar wenno panagliwat a mangan ken abstinensia wenno saan a panagsida iti karne, ken panangiwayat kadagiti aramid iti kaasi kas ti pananglimos ken panangipaay iti tulong kadagiti napanglaw ken agkasapulan iti saranay. Nalawag ti Adal-Pammati maipapan ti pannakapakawan iti basol babaen ti panagkompesar iti padi. 

Iti nagrigat a kasasaad dagiti Pilipino ket kayariganna ti makatawen ken agnanayon a panagpenpenitensia dagiti napanglaw. Isu a ti kapatgan iti Semana Santa kadagiti marigrigat, ket napudno a panagkararag ken panagpakawan ken ni Apo Dios kadagiti basol ken panagbalbaliw iti dakes a wagas ti panagbiag.

Kaaduan kadagiti agarup a 105 a Million a Pilipino ket agbi-
biag iti napanglaw a kasasaad. Adu kadakuada dagiti saan a
mangan iti mamitlo a daras iti inaldaw. Adu kadakuada dagiti saan a makasida iti karne gapu ti kinangina dagiti magatgatang. Adu kadakuada dagiti awanan iti natalged a pagtaengan. Adu kadakuada dagiti matmatay a napanglaw gapu iti nagduduma a sakit a gapu iti kinakurang dagiti pangpubliko nga ospital ken serbisio iti salun-at.

Iti laksid ti kinarigat ti panagbiag, napadagsen pay gapu ti na-
ngina a buis nga epekto ti Tax Reform for Inclusion and Acceleration Law. Agtultuloy met ti pannakagundaway dagiti adu a mangmangged babaen ti contractualization, nababa a sueldo ken bassit a benepisio.

Ita a Semana Santa ket panawen ti panagmiris, saan laeng iti bukod a bagi ken panunot, ngem dagiti mapaspasamak iti Pilipinas a maikontra kadagiti panursuro ken aramid ni Apo Jesucristo a nangguraan kenkuana dagiti agturay, dagiti maestro ti linteg ken papadi, tapno isuna ket nakedngan a nagsagaba ken natay iti krus.

Iti panangikasaba ni Apo Jesucristo iti Naimbag a Damag, impaneknekna ti panangay-ayatna ken panangisaksakitna kadagiti napanglaw ken awanan-gaway. Pinakanna dagiti mabisbisinan. Inagasanna dagiti masaksakit. Insublina ti panagkita dagiti bulsek. Pinakawanna dagiti nagbasol. Tinubngarna dagiti kinikillo ken dakes nga aramid. 

Naglatak ni Apo Jesucristo gapu kadagiti adu a nasayaat nga aramid nga impaneknekna ket nagamak dagiti turayen ken inapalan dagiti lider ti pammati a dagiti panursurona ken ar-aramidenna ket agpeggad dagiti akem ken turayda. Dayta ti gapu a nagkukomplot ken plinanoda ti pannakaaresto ken pannakaikeddeng a maparparigat ken matay iti krus ni Apo Jesucristo.

Iti agdama a tiempo iti Pilipinas, pilawen dagiti natibker ti pammatina a Kristiano – Katoliko ti agtultuloy a pananglalais ni Presidente Rodrigo Duterte iti bigbigenda a Dios, ken dagiti lider ti Simbaan, gapu ti agtultuloy a kritisismoda iti nadara a kampania ti gobierno kontra iti illegal a droga a rinibun a biag dagiti nakettel a kaaduanna ket dagiti napanglaw ken awanan-gaway.

Ni Apo Jesucristo kas managayat ken naasi nga Ama ken Adipen-
Pangulo ket pinakawanna dagiti nagbasol a dimmawat iti pammakawanna. Ngem iti agdama a tiempo, ania ti mapaspasamak kadagiti nakaaramid iti basol wenno naglabsing iti linteg?

Maysa ni Caloocan Bishop Pablo Virgilio David kadagiti kritiko ti Presidente iti nadara a kampania ti agdama nga administrasion kontra illegal a droga gapu ta dagiti masakupanna a siudad ti Caloocan, Malabon ken Navotas ket nagbalin a “killing fields” kadagiti suspek nga adda pannakainaigna iti illegal a droga.

Gapu iti panangatakar ni Bishop David ken ni Presidente Duterte iti nadara a kampaniana kontra illegal a droga, ket aglalaok dagiti dakes a balikas ken pammabasolna iti Obispo. Sangsangkamaysa met dagiti Obispo iti Pilipinas a mangdepdepender ken ni
Bishop David.

Iti laksid dagiti masansan a panangin-insulto ti Presidente iti Dios dagiti Katoliko ken dagiti lider ti Simbaan Katolika, ket kasla awan ti epektona daytoy kadagiti minilion a Katoliko a kaaduan a bilang dagiti umili iti Pilipinas.   

Ita a Semana Santa, gundawayan koma dagiti Katoliko a Pilipino a panunoten ken amirisen ti nauneg a kaipapanan daytoy a panawen a panaglagip iti gapu ti panagtutuok ken ipapatay iti krus ni Apo Jesucristo. (Eden Alviar)