Panangaramat iti dila (Tuloyna)

“HELLO, may mader dir! Mmm, insangpetankayo iti halohalo. Halohalo a nakalamlamiis ta pulos nga awan met ti lako a halohalo a napudot, he-he-he!”

“Lukdit, balbalatongem manen ta inam! Panawankayo man laengen ta dikanto makatosan a dina oras! Bulbulatsingka la nga agpayso…”

“Dimo kayat, tatang? Saggaysatayo a baso daytoy ginatangko.”

“Bagiyo laengen. Innak pay agraat idiay bangkag a minulaak ti lasona.”

“Isu a, he-he! Daytoy mader dir, agpalamiiskayo tapno maikkaten a maminpinsan ti gita ti dila ni Jobel a naipigket iti panunotyo, he-he! Antidote met ti halohalo iti gita ti dila. Sigurado dayta. Mangankayon sakbay a marunaw…”

“Ania ket ti anakkon, aya…”

“Diyon panunoten ni Jobel. Daytoyen halohalo ti panunotenyo nga ibusen. Pagpalamiis iti nakem a nasakit…”

“Ala man laengen…”

“Kasta a, umisemkayo met, ta makapaubing kano ti isem, kunayon sa, he-he!”

“Dayta ti pagayatak kenka nga ubing ta ammom ti mangay-ayo…!”

ITI BALAY da Nana Maring, napasnek pay laeng ti ina a mangbagbaga ken ni Jobel.

“Maiyarig ti dila iti apuy a manguram iti kinataotayo no ditay maaluadan. Puoran  ken pukawenna ti kinaimbagtayo.”

Saan latta a matimtimek ni Jobel.

“Adda ti dila iti uneg ti ngiwat. Dayta ti naituding a yanna. Nakalemmeng wenno nailemmeng tapno di agisaknap iti kinadakes no di maaluadan. Agpayso la unay ti kuna ni Santiago: mapaamo amin a kita ti ayup, dagiti tumatayab, agkarkarayam ken dagiti  nagbiag iti danum ngem saan a mapaamo ti dila. Ammom kadi ti kasayaatan nga aramiden, anakko?”

“A-ania kadi, nang…?”

“Agannad. Agparbeng. Dayta ti kasayaatan nga aramiden. Kastoy ti panagannad: no awan ti importante wenno nasisita a sawem, agulimekka.”

“Kasanon no makaluksawka?”

“Isu a pagturayem ti kinaparbeng. No makaluksawka dimo aramaten ti dilam ta amangan no makaisawangka iti sumalpot iti barukong ti pakaluksawam. Ta ammom kadi a nasasaem nga adayo ti ipas ti balikas ngem ti labaha? Agsipud ta  agpatingga laeng ti labaha iti kudil wenno ti lasag ti masugat ket maagasan daytoy babaen ti medisina. Ngem nasasaem nga adayo ti ipas ti balikas  ta sumalpot iti kaunggan, umukuok iti barukong, lilibegenna ti natarnaw a panunot. Pagsakitenna ti nakem. Kas ken ni nanam nga Iska. Ania ita, di nasakit ti nakemna kenka?”

“L-ladingitek unay, nanang. Pudno la unay a diak naaluadan toy bagik iti panangisawangko iti kasdiay. Nabiglaak…”

“Nasayaat la unay no aminem dayta, anakko. Nagbasolka ken ni Mari Iska babaen ti balikas a makaipas. Pues, iti balikas met laeng ti pangagasmo…”

Sibabain ngarud ni Jobel a napan iti balay da Nang Iska iti kamalmanna a nalamiisen ti darang ti init ken kumulkuldit manen ti panagay-ayam ti pul-oy. Nasken nga aramidenna ti kinalinteg tapno masulnitanna ti nagbiddutanna. No iti balikas a nakabasol, iti met laeng balikas nga allangonenna ti nagbiddutanna.

“Nana Iska, ladingitek unay ti panangisawangko iti kasdiay kenka. Diak nagawidan toy dilak. Saanton a maulit, ket agkiddawak iti pammakawan. Pakawanennak koma, Nana Iska…”

“A, e, J-jobel, balasangko…”

“Nana Iska, pakawanendak koma. Ikarik, wen, agan-annadakon iti aniaman nga isawangko. Pakawanendak koma, Nana. Napudno unay ti panagbabawik…”

“No napudnoka, balasangko, pakawanenka. Ta asinoak koma a parsua a dina ammo ti mamakawan? Mamakawanto pay ti Dios, anianto la ket kaniakon a pinarsuana?”

“Agyamanak, Nana Iska, agyamanak.”

Manipud iti siled, rimmuar ni Henry.

“Agurayka, Jobel, itulodkan. Bareng no addan banagen ti irengrengrengko kenka…”

Napanganga iti nakadakdakkel ti ina ken nagmulagat iti kas iti kabus a bulan ken kasla naengkanto ta naidarekdek lattan iti nagtakderanna bayat  ti panangisursurotna iti matana iti likudan ti naragsak a baro ken balasang nga inalun-on ti bit-ang ken mangiladladawan iti sabali pay nga eksena ti biag.

Maymaysa ti dila ngem di pay, mariendaan, anianto la ketdin no dua? Di pay mariendaan ti maymaysa anianto la ketdin no duada? Umno laeng ngarud a nailemmeng iti uneg ti ngiwat tapno agtalna ken sala la  mairuar no umno ti pakaaramatanna.#