Panangilagip ti EDSA People Power Anniversary

ADDA ngata iparparipirip ti panawen ta nagsayaat la ketdin ti panagsaruno ita a lawas ti pannakailagip ti maika-34 nga anibersario ti umuna nga EDSA People Power Revolution ken ti Ash Wednesday wenno Mierkoles Kurkurus, ti rugi ti panagngilin dagiti Katoliko iti Tiempo ti Kuaresma.

Ita a Pebrero 25, 2020 ket lagipen dagiti benepisario, karakter ken bannuar iti umuna a People Power Revolution a napasamak sadiay Efipanio De los Santos Avenue kangrunaanna iti nagbaetan ti Kampo Aguinaldo ken Kampo Crame iti Quezon City. Nakipagpaset iti dayta a naisangsangayan a panagalsa dagiti adu a soldado, polis ken sibilian kontra iti agdama idi nga administrasion ni Presidente Ferdinand Marcos.

Ti aldaw a Pebreo 25, 1986 ket dua a Presidente ti Pilipinas dagiti nagsapata – ni Presidente Marcos sadiay Malacañang, ken ni Presidente Corazon Aquino a nagsapata sadiay Club Filipino iti San Juan. Da Marcos ken Aquino dagiti nagsalisal iti kalkalpas a February 7, 1986 Presidential Snap Election. Karabianna, isu met ti ipapanaw iti Malacañang daydi Presidente Marcos ken ti pamiliana ken dagiti nasinged a kaaliado ken pasurotna babaen ti iluluganda kadagiti helicopter ti United States Air Force. Immuna a naipanda sadiay Clark Air Base, sada naipan sadiay Guam ken Hawaii, USA. Dayta a rabii ti alimpatok ti uppat nga aldaw a rebolusion dagiti soldado ken umili a nangrugi idi malem ti Pebrero 22, 1986 sadiay Ministry of National Defense Building iti Kampo Aguinaldo, Quezon City, kalpasan nga indeklarar da Defense Minister Juan Ponce Enrile ken Armed Forces of the Philippines Vice Chief of Staff Lt. Gen. Fidel Ramos ken dagiti kakaduada iti Reform the Armed-forces Movement, ti isisinadan ken ni Presidente Marcos.

Napateg iti panagballigi ti People Power ti suporta ti Simbaan Katolika nangruna ken ni Jaime Cardinal Sin nga Arsobispo ti Manila a nangawis kadagiti papadi ken mamadre ken kadagiti adu nga umili a mapanda suportaran ken bantayan dagiti nagrebelde a soldado sadiay Kampo Aguinaldo ken Kampo Crame.

Adu dagiti mamati a naindaklan a milagro ti napasamak a saan a nadara a rebolusion ta nagbalin ti imahe ni Santa Maria a kas salaknib dagiti rebelde a soldado kadagiti loyalista puersa iti agdama a turay a naibaon a mangatake koma kadakuada iti uneg ti kampo manipud idi nangrugi agingga ti alimpatok ti rebolusion. Nabigbig a milagro ti kaadu dagiti tattao a nanggapu iti nagduduma a tukad ti panagbiag a nagkaykaysa a nangibarikada kadagiti bukodda a bagi kadagiti tangke dagiti loyalista puersa a naibaon a mangraut kadagiti rebelde a tropa.

Maibasar kadagiti nasurat a pakasaritaan ti EDSA People Power, bigbigen dagiti rebelde idi a soldado a ti namagbaliw ti situasion ket idi nagbaliktad dagiti puersa ti Philippine Air Force a mapan mangraut ken mangbomba iti Kampo Krame a naudi a nagkutaan da Minister Enrile ken Gen. Ramos ken dagiti pasurotda idi parbangon ti Pebrero 24, 1986. Manipud iti tangatang, naimatangan dagiti piloto dagiti attack helicopters ti “human cross” dagiti reprep a tattao iti nagkurusan ti EDSA ken Boni Serrano Avenue, iti asideg ti Kampo Crame, nga imbes a binombada dagiti rebelde, ket indissoda dagiti luganda nga attack helicopters iti parade ground ti kampo, ket nakikapponda kadagiti rebelde a soldado. Dagita a puersa ti imbaon ni Gen. Ramos a nangisayangkat ti “psychological air assault” iti Malacañang a nangpataud iti buteng ken nangpalukneng iti nakem ket nagdesision daydi Presidente Marcos ken nakombinsir dagiti Amerikano a panawannan ti Malacañang. 

Iti daytoy a tawen a panangilagip iti maika-34 nga anibersario ti EDSA People Power Revolution, no man pay adun ti nagbaliwan ken bimmaawen ti panagrambak gapu ti kurang a pannakitimpuyog ti gobierno, agbalin latta daytoy nga aldaw a napnuan iti kaipapanan kadagiti umili a mangipatpateg iti demokrasia ta iti dayta nga aldaw ti pannakaisubli ti wayawaya kadagiti Pilipino a nakalak-am iti panagabuso idi tiempo ti Martial Law. Ipalagipna met latta ti panagtalek dagiti Pilipino iti Dios a babaen ti ayat ken asina ket magun-odda dagiti tarigagayda.

Ita nga anibersario ti EDSA People Power Revolution ket ipalagipna met kadagiti aglablabes nga opisial ti gobierno a saan nga agnanayon ti turayda ta dayta ket naggapu kadagiti umili a no agkaykaysada ket maibabawida dayta nga inkawesda a bileg. â—Ź