Footer

Panangilawlawag-pananglagip (Maikadua a paset)

Kolum: Iti Duyog ti Singasing

Ni Jaime M. Agpalo, Jr.

 

Binaliwak a sinurat, adda dagiti inikkatko a pasetna ken ninayonak. Ket impostek idi Hunio 21, 2002 tapno adda mabasa ken kas produkto ti Literatura Ilokana a drama; ta nasken a padur-asen ti kabukbukodan a literatura.

Kasano a nasuratko a kas radio drama script?

1994 idi nasurat. No agikamakamtayo kadagiti script ti radio, ti la pagpidpidutanen iti idea. Uray ania a tema, adda  katukadna a pangiseksekan: agparikut ken padas iti biag, agpakatawa ken mangray-aw, mamutbuteng ken mamagkullayaw, paranormal ken pantasia, lab-istori a makapaisem ken tear jerker ken adu pay. Kamkamaten ti oras, lalo ket kabayatan ti innak panagimakinilia, isamira nga igiddan met ti panagluto ken panangaywan kadagiti babassit nga annak. Kamkamaten ti oras ket di payen makudkod ti nagatel a kunada iti ini-Iloko. Nasken a makaimakiniliak iti uppat (20 a minutos agingga iti 30 a minutos ti maysa) wenno ad-adu pay a minutos.

Kabayatan ti panagpanunot iti suraten, naipatangatang iti radio cassette ti kansion.  Inalingagko ken inalisar a nalaing, ti kansion ni Karen Carpenter (manipud iti The Carpenters)  a napauluan iti “(I’m Caught Between) Goodbye and I Love You.”

Ania ti aramidek? Nagpintasen a kanta! Mangsuratak man iti makapikapik, makapasangit, daytay nakalidliday unay a panagpinnakada para iti drama a “Mr. Lonely.” Maysa a love story, daytay man makapespes iti sangabaniera a lua. Mangaramidak man met iti bukodko a bersion!

Ngem kasano nga aramidek dayta? Dayta ti karirigatan a partena. No maminsan, narigat ti mangirugi iti sinurat.

Ngamin, kasursuratko la unay, kalkalpasko ti script iti “Dear Manang Helen” a programa ni Manang Helen Selga maipapan kadagiti parparikut—nagduduma a parikut ken padas iti biag. Agtaud ti maaramid  nga script a maidrama manipud iti nagkaadu a sursurat dagiti listeners. Aramidek lattan a, uray ania a parikut ken padas iti biag, ngem priority dagiti surat dagiti listeners. Adda surat ti maysa a balasang a tinedier, agparikut unay ket kidkiddawenna ti madagdagus koma a pammalakad ni Manang Helen Selga iti programana-drama a “Dear Manang Helen.” Binilinnak ni Manang Helen a suratek nga insigida ti script ken ti balakad ta kaasi met piman ti tinedier. Nadagsen ti parikut ti tinedier ta masikog daytoy ngem madamada pay laeng nga agbasbasa iti kolehio ken ti boyprenna. (Salbag ketdi, isuda ti akinparikut, mairamankami pay a scriptwriter. Naimbag pay ti presenter, ni Manang Helen, ta basaenna laeng ti maaramid nga script) ta saan nga agparikut iti ibalakad. Dayta ibalakad ti narigat a punto ken nasken a matingiting a nalaing, nasken ti aplikasion ti positibo a banag ken umayon iti naimbag a pannursuro ken pammalakad. Estrikto met ngarud unay ti editor no saan nga umno ti inaramid a balakad iti script, ma-reject, mangsurat manen iti sabali. Estrikto la unay ti bumaketen a madre nga editor! Wen, adda met editormi iti radio, kunayon sa!

Dayta, nasuratkon ti script a padas ken ti parikut a programa-drama ni Manang Helen. Next script manen. Kastoy lattan iti inaldaw nga aramid. Agsurat nga agmalmalem. Makitienda iti nateng ken prutas iti parbangon ta ilakonto ni baket iti talipapa. Kasta ti rutinak iti inaldaw.

Ania ti sumaruno nga script a suratek? Narigat iti mangirugi.  Ti “Mr. Lonely” a makapasangit wenno daytay drama a “Kapitan Enteng” a makapakatawa wenno “Kasta la ti Biag” a makaparay-aw? Dagita ti immapay a saludsod a kumurikor.

(Maituloyto)

 

 

, ,