Panangilawlawag-pananglagip

Kolum: Iti Duyog ti Singasing

Ni Jaime M. Agpalo, Jr.

(Maudi a paset)

 

 

Agingga nga impadamag dagiti kaarrubada a mapmapan ti lalaki iti balayda. Konprontasion. Kayat ti babai nga agsinadan ken ni tungngang nga asawana ket agsublidan nga agina iti pudno a lalaki nga ay-ayatenda. Ken maysa, dayta ti tulagda sakbay a nagkallaysada, saan kadi? Isu a napasamak ti inda panagsina. Agsangsangit iti pirmi ti lalaki a mapanawan kasta met ti babai a pumanaw iti inda panagpinnakada. Anian…!

Lonely ngarud, “Mr. Lonely” isu nga adda latta sangsangit lalo iti udina, ania la ketdin, aya! Lalo ket naglaing met nga agdrama dagiti dramatista ti MPBC, ket pudno nga agsangitda iti pirpirmi, saan laeng a tissue paper wenno panio ti pagpunasda iti luada no di ket labakara wenno bassit a tuallia. Ket urayak la nagkatawa, nagellek iti pirpirmi nga agbuybuya kadakuada iti taping-dubbing, ta kunam met la no pudpudnon nga isuda ti agparikut, he! Bagtit dagitoy a dramatista, nakunak man. Nalipatak nga on-the-air gayam ket nadadael la ket ngarud ti recording! Asysus, he-he-he! Pinaruarnak iti studio ti supervisor ket inulitda manen ti nagirekord, ania ngarud. Pinanawakon ida ket nagawidak laengen ta agaramidak manen iti makapasangit a “Mr. Lonely!”

Atiddog nga script dayta “Iti Nagbaetan ti Panagpakada ken Ay-ayatenka,” bumaktaw iti 30-minutes ta karaman met ti music (Intro, interlude, etc), intermission, advertising, station ID, ken dadduma pay.

At-atiddog a suraten dagiti naliday ken makapasangit ngem dagiti makapakatawa. Ngem adda remediona babaen ti panangiyababa iti musika, nga aramiden ti beterano nga spinner, ni Reggie Castillano nga isu payen ti supervisor iti drama production center. Idi katengngaan ti 1980s nga immuna a nagsurattayo iti MPBC babaen ti bukanegan a programa nga imatonan ni Manong Bobby Gutierrez, ti undisputable King of Ilocano Songs, ngem saantayo a nagbayag ta adda met trabahotayo a nasken nga ipamaysa nga aramiden.

Kasta ti pannakaisurat dayta nga script a napauluan iti “Iti Nagbaetan ti Panagpakada ken Ay-ayatenka” kasilpo, kanayon, sequel iti orihinal nga script a parikut iti “Dear Manang Helen” nga insurat iti avid listener ken maysa nga estudiante (taga Region II). Na-modify ti idea ti “Dear Manang Helen”, ket nagbalinen a “Mr. Lonely” a drama iti isu met laeng a paulo a background a musika, ti “Mr. Lonely” manipud iti nalatak a singer idi 1960s a ni  Bobby Vinton; adda met bersion ni nalatak  a Victor Wood ngem mas namaymayat,  ken  napinpintas, makaterred-rikna ti orihinal a bersion ni Bobby Vinton.   Ket kabayatan a sursuratentayo daytoy a sinurat, siempre, pinatokartayo dagiti kanta, agsinnublatda, ti “Mr. Lonely” ken ti “(I’m Caught Between) Goodbye and I Love You.” iti met laeng YouTube, isu a nalagiptayo dagiti makapaisem a pasamak dayta nga script.

Kasta ti pannakainaw ti pannakasurat ti script.

Agsipud ta naessemtayo nga ag-modify kadagiti script, sinukatantayo manen, inaramidtayo met tatta a sarita ken impablaak met ‘toy pagiwarnaktayo, Tawid News Magasin iti isu met laeng a paulo, “Iti Nagbaetan iti Panagpakada ken Ay-ayatenka.” Saankon a malagip no kaano a naipablaak, awan ngaminen ti file-tayo.

Umabut iti ribu dagiti iduldulintayo nga script; dagiti dadduma, inaramidtayon a short story ken novella.

Kadagiti IT students’ iti DMMMSU, South La Union Campus (SLUC), a nangaramid iti ababa a pelikula, nabara a kablaaw kadakayo amin! Nangruna kadagiti nalalaing a nagakem kadagiti agbibiag.#