Panangpolis dagiti traysikelan iti bagida, naipaganetget

CABUGAO, Ilocos Sur – Impaganetget ni Mayor Edgar Cobangbang, Jr. kadagiti agpaspasada iti traysikel ditoy ti panangpolisiada iti grupoda tapno malapdan ti panagabuso dagiti dadduma.

Inyunay-unay daytoy ti mayor bayat ti pannakimitingna kadagiti drayber ken operators ti traysikel ditoy nga ili idinto nga imbatadna nga adda kaapagna a community service ti aniaman a panaglabsing dagiti agpaspasada iti traysikel kadagiti naipasa nga ordinansa.

Inkari ti mayor nga ikkanna iti paglinongan dagiti parkingan ti traysikel, kas kiniddaw dagiti grupo dagiti traysikelan ditoy nga ili.

Immanamong met dagiti agpaspasada a singirenda laeng ti plete a P8.00 kadagiti senior citizens ken P7.00 kadagiti estudiante.#