Footer

Vigan City Jail

Panangted iti gundaway kadagiti balud nga agbalin a produktibo nga umili, awis ti Vigan City jail warden

VIGAN CITY – Panangted ti gobierno ken kagimongan iti naan-anay a gundaway kadagiti balud nga agreporma ken agbalin a produktibo nga umili ta isuda ket biktima laeng dagiti nagduduma a pasamak iti biag.

Dayta ti kangrunaan nga inyawis ni Jail Inspector Reyland Tabios, Warden ti Vigan City Jail kadagiti kameng ti Ilocos Sur Integrated Press kabayatan ti naangay a Kapihan iti Amianan Media Forum.

Impakaammo ti warden ti city jail nga adda iti salinong ti Bureu of Jail Management and Penology, nga agtultuloy ti panagsanay dagiti balud wenno persons deprived of liberty iti city jail kadagiti nagduduma a kurso iti teknikal ken bokasional tapno makasursuroda kadagiti trabaho a makaipaay kadakuada iti pagsapulan. Maisaysayangkat dagiti kurso nga accredited ti Technical Education and Skills Development Authority kas ti panag-welding, beauty courses, woodcraft ken panagaramid kadagiti dekorasion.

Inaldaw met nga adda dagiti pannakabagi dagiti nagduduma a relihion tapno maaddaan dagiti balud kadagiti naespirituan a taraon ket maikkanda iti anus, kinatibker ken inspirasion nga agbabawi ken agbalbaliw, kabayatan ti panagnaedda iti city jail a pangur-urayanda ti resulta dagiti kaso a nakaidarumanda.

Maipapaayan met dagiti balud iti gundaway a bisitaen dagiti pamilia ken gagayyemda, ken adda pay couple’s room a pribado a siled kadagiti agassawa. Amin a bisita dagiti balud ket agdalan iti naan-anay a pannakakapkap wenno body search. Adda met dagiti kellaat a pannakaisayangkat ti Oplan Galugad a panagsukain kadagiti selda.

Impakaammo ni Isp. Tabios nga iti agdama ket adda 76 nga inmates iti city jail, ken 13 kadakuada dagiti babbai ken 63 dagiti lallaki. Agdagup iti 41 dagiti sumangsango iti kaso mainaig iti illegal a droga; adda dua nga addaan iti kaso a murder a maibilang a high risk detainees; adda met dua a balud nga agtawen laeng iti 19 – 20.

Inlawlawag ti warden a disiplinado dagiti inmates iti VCJ ta nainget a maiparparit ti droga, panagsigarilio, panaginum iti arak, ken panagaramat iti cellphone. Binulan pay ti pannakaiwaywayat ti drug test kadakuada a BJMP personnel, ken 20% dagiti amin nga inmates iti supervision dagiti pannakabagi ti Philippine Drug Enforcement Agency, City Health Office ken Provincial Health Office tapno maduktalan no adda dagiti agar-aramat iti droga kadagiti agserserbi ken inmates iti city jail.

Inlawlawag ti warden a P60 iti inaldaw laeng ti meal budget dagiti balud ket narigatda a mangiyanay iti tallo a pannangan, ngem ikagkagumaanda a nasayaat ti pannakataraon dagiti inmates. Adda met half court a pagbasketbolan tapno makapagwatwat ken mainitan dagiti balud.

Pinagyamananna ti naan-anay a suporta ti Vigan City Government kadagiti nagduduma a kasapulan ti VCJ ken dagiti balud. Impakaammona nga addan plano ti BJMP a mangi-relocate ti VCJ iti nalawlawa a lokasion tapno saan a marigatan dagiti balud no umadunto pay ti bilangda, ken tapno maaddaanda iti umanay a lugar a pakaisayangkatan dagiti livelihood trainings, panag-ehersisio, ken nalawa a pagmulaanda kadagiti nateng tapno adda nayon dagiti taraonda. Inlawlawagna a mayor-uray laengen ti deed of donation ti lote a pakabangonanto ti baro a VCJ facilities.

Impaganetget ti warden a narigat ti biag ti mabalud ta maawanan iti wayawaya, ket inyawisna nga ikagumaan koma dagiti tattao ti makaaramid iti krimen nangruna ti panaglako ken panagusar iti illegal a droga ta dayta ti kaaduan a kaso iti agdama. Kiniddawna iti publiko pay ti pannakaited koma iti gundaway kadagiti rimmuaren iti pagbaludan a nawaya a makitipon ken makilangen iti kagimongan. (Eden Alviar)

, , ,