Panawen manen dagiti periaan

Salaysay ni Errol L. Abrew

  (Maikatlo a paset)

 

Isu a saan a nakakaskasdaaw a dagiti umili, a naulaw kadagiti karkari, nakaibotosda iti maysa a kameng iti Sangguniang Bayan a sanggun-uni, saan nga agun-uni.  No aguni, maminpat la iti makabulan.

Ket ania ngay ti unina, atanud?

I second, the motion, kunana idiay sessionan.  Mapanen a disisais mil ti uppat nga unina, ta linawas ti sessionda.

Rigatna, atanud, mailatang pay idiay badyet ti munisipio ti igatang ti salonpas.  Salonpas?  Wen, atanud, salonpas.  Ta dina met ammo ti maki-debate wenno maki-deliberate idiay sessionan ti tabbed a konsehal.  Agwingwingiwing nga agpa-kannawan, agpa-kannigid ti tengngedna a mangbuybuya kadagiti kakaduana nga agdedebate.  Salonpas ti maipigket iti likud teltelna ta naktanganen iti katatalangkiawna, atanud.  Unayen.

Ket inton dumanon ti pagtungedan ti tawen, tarimaanendanto manen daydiay swivel chairna, ta naabutanen piman, ta di met tumakder a mapan dumiskurso, inabutannan ti tugawna a nagukopanna.

Kitaem dagiti artista a senador idiay Senado, atanud.  Nakamulenglengda lattan piman nga agbuybuya kadagiti agi-eskrima a kapatadanda iti panagsisinnukatda iti argumento ken kapanunotan.  Isu a didan maaluadan ti agsakar, tapno makuna laeng met nga adda met kampay idi karga dagiti utekda.

Wenno isuda ti para-anawa, no ta naghaybladen ti maysa kadakuada ket rugiannan ti agrasaw wenno agkarit kadagiti padana a senador.

Isu a no maminsan, basoltayo met laeng a botante.  We got what we deserve, naganabtayo iti kinamuttalengtayo ti kaadda dagidiay a pasusuelduan laeng, padagsen iti kaha ti umili.

 

Agnakemtayo met koman

 

Agnakem ken agparbengtayo koma, sangkakuna dagiti taga-Simbaan.  A ngem, isuda met ti front liners a sumangkautro nga agaw-awat iti pasuksok.

Itedmo ken ni Father Aliwegweg, ta agpamisa, kunan’ politiko a mangiyawat iti sobre iti sakristan.   Rason ti padi: uray aggapu iti sugal wenno sairo, no la ket para kadagiti napapanglaw, awan diperensiana ti agawat.

Kayatna a sawen, balitungeg, korapsion, ti amin.  Korap dagiti kandidato.  Korap dagiti botante.  Korap ti Simbaan.  Korap ti gobierno.

No ar-arigen, kasla awanen namnama ti pagilian a sumayaat pay ti biag ti kadawyan a Filipino.  Ngem kina-agpaysuananna, ad-adu pay met la nga amang dagiti botante a manakem.  Nga iti panaglabas ti sagtunggal eleksion a pakipartisiparanda, in-inut met laeng a naamirisda dagiti nagbiddutanda a panagpili.

No taliawen iti resulta kadagiti napalabas nga eleksion, ammo metten dagiti botante ti inalat dagiti artista.  A ti kasapulan ket saan a daydiay kinalatak no di ket iti kabaelan ti birokenda iti tunggal kandidato.

Kuna dagiti eksperto iti politika nga agpalpaliiw, a ti maysa a kagimongan a narang-ay ti ekonomiana, sumursurot metten nga agbalin a nanakem dagiti botantena.  Ta no la ket addaan panggedan wenno simmaliwanwan ti panagbiag dagiti umili, adayo la ket a mapasamak ti pannakasulisogda iti inda panangilako wenno panangisaldada kadagiti botosda.  Kadagiti makunkuna a pagilian a nasaliwanwan kas iti Estados Unidos, Gran Britania, Australia ken dadduma pay nga addaan iti nanakem a demokrasia, umanayen ti panagdedebate dagiti kandidatoda, a pakangngeganda kadagiti plataporma ken polisa a pangibatayanda iti kayatda a pilien ken botosan.

Ngem ditoy Filipinas, numan pay nasapasap ti panagari ti kuarta, adda pay met la dagiti kas iti daydi Dios-aluadna a Sek. Jessie Robredo ti kalidadna a nabotosan.  Dagidiay a klase ti birokem ditoy lugaryo.

Ala, ket kitaentayo a, atanud, no kasano metten ti kaadayo ti addang a nagnakeman ti nalatak a demokrasia a managan eleksion iti pagilian, iti panagbotostayo inton Mayo 13, 2013.

Palagip laeng no mapanka kadagiti periaan ken restoran, atanud: pagpennekem ta tianmo, ipaturaymo a dandani magsatan, paragsakem dayta matam, lapayag ken pusom, iti inda panagsala, panagpakatawa ken panagdrama.  Ala ket awatem a no aniaman ti ipapetpetda, nakapannimid wenno tallot’ taona, sardinas, bagas man a naisupot.   Ngem kamaudiannanna, pagariem ta utekmo inton addakan idiay uneg ti biombo.  Iyarasaasmonto iti kaunggam – ditam nga umanglem, ditam nga umasuk, ni inam a korap a politiko.

A ngem, kasanon, kunam ngata, no nairana a korapda amin?  ‘La ket piliemon a datay kabassitan ti sarana.  Lesser evil, basbassit a sairo, kunada iti Inglis.  Good luck, atanud.#