Salaysay ni Errol L. Abrew
PERIAAN, kunam, atanud? Datay tunggal piesta ket umayda agpabuya kadagitay datdatlag a naparsua? Lalaki a tallot’ sakana? Lalaki a kasla kurita ti kaadu dagiti imana? Babai a dua a dangan ti katayagna? Kasla datay naasawa ti Uliteg Amor ni Ganie Bermosa? Santo dagitay tattao a kanenda ti apuy wenno ipauy-oyda ti atiddog nga espada a dumanon lansad ti bitukada ken komediante nga agpakpakatawa? A ngem ne, he-he-he! Baka sabali met a periaan ti ibagbagamon atanud?
Nangrugi ngaminen ti panagkakampania dagitay, komediante, este, politiko, atanud. Circus season manen, panawen manen dagiti periaan.
Ket ne, mapan a 18,053 da amin a pabotosan, kunamsa, atanud. Sangapulo ket dua dagiti senador; 233 dagiti diputado; 58 dagiti party-list a diputado; 80 dagiti gobernador; 80 met dagiti bise-gobernador; 766 dagiti kameng iti Sangguniang Panlalawigan; 143 dagiti city-mayor; 143 met dagiti city-vice mayor; 1,598 dagiti kameng iti Sangguniang Panlungsod; 1,491 dagiti mayor iti ili; 1,491 met dagiti vice-mayor iti ili; 11,932 met dagiti kameng iti Sangguniang Bayan; 1 nga ARMM regional governor; 1 met nga ARMM regional vice-governor ken 24 nga ARMM regional assemblymen.
Kayatna a sawen, mapanen nga aganay a kagudua’t maysa a bilion ti mabusbos a kuarta tapno addanto manen sabali a grupo dagiti tulisan, este, agserbi (kano) kadagiti umili kalpasan ti Mayo 13, 2013.
It’s more fun ditoy ‘Pinas
Wen atanud, mas a nakaay-ayo ti pinnulitikatayo ditoy Filipinas. Agruar manen a kasla sunggo dagiti politikotayo. Aglalagto, agsasala, agkakanta, agpakatawada iti sanguanantayo. Agbalinda amin a maymaysa: artista iti sanguanantayo.
Diak pulos malipatan ti diskurso daydi Don Camilo Osias idi agkandidato a senador. Kastoy ti kanayon nga ibagbagana, manipud Aparri agingga iti Jolo:
Botosandak, kakabsat, ta siak laeng ti kandidato a ti nagan ken apeliedona adda idiay langit. No tumangadkayo idiay langit ket makitayo ti first quarter a bulan iti sukogna a letra C, Camilo ti kayat a sawen daydiay. Ket no kabus met, nalawag a letra O, Osias. Isu a didak liplipatan nga isurat tapno makadanonkayo idiay langit.
No ipasimudaag man daydiay a diskurso ti panangrukod met ni Apo Osias iti kasasaad ti kapanunotan ti tunggal botante idi, awan met pulos nagbaliwanna agingga ita. Daydi utek-monamon, utek-pasayan ngatan ita?
Plataporma? Saan nga uso daydiayen, atanud. Plata (kuarta) ken porma (pa-pogi points) ti uson a kababalin dagiti politiko, atanud. Wenno datay, awan-papatayanna a formula: 3Gs, wenno 4Gs pay ketdin kadagitoyen: guns, gold, goons ken Garci.
Saan la a daydiay. Adu manen dagiti manglukat a restoran. Restoran? Wen atanud, no kayatmo ti libre a makan, saramsam, nasanger a mainum, taraon iti boksit man ken iti lasag, apanka la kadagiti balbalay ken headquarters dagidiay a politiko iti awan-kikidditan nga abastoda.
Ken uray nakasaangen dayta nga anti-Epal Bill, nagkaadu latta iti aglawlaw dagiti streamers ken paanunsio, pakablaaw dagidiay a napuskol ti ruprupada ken naandur ti rusrusokda a papili. Happy Fiesta to the People of Caba, Greetings from Hon. SB Eutropio Procopio and Family. Mayat ti PR na, Puskol Rupa.
Natural, atanud, mapan a kaguduat’ bilionto manen ti gastusen ti COMELEC tapno maisaad dagitoy kabarbaro a mannibrong. Siempre, panubbotandanto ngay kadagiti inwarasda a pagkampaniada?
Sub-contract idi nalpas a sub-contract dayta a rangtay. No matukkol wenno maiyanud, a pakaibuisan pay ti karadkad, addanto latta masindadaan a pambar. Nakem ti Dios. Kaslaka la agbasbasa kadagiti pasamak iti Nobel Prize winner a nobela a “The Bridge of San Luis Rey,” ni Thorton Wilder. Nungka man, ditayto mangngeg, takaw ni politiko.
‘Sumilasu’ a rupa, ‘duma la karinnupakda
No apanmo tan-awan dagiti napan a nagisubmiter iti kandidaturana, atanud, maumakan, ta isu met la nga isu a rupa. Ti la pagdudumaanda ti itsura dagiti kalabanda. Ta pay ngay?
Datay kunadan iti Inglis, “In politics, there are no permanent friends, or permanent enemies, only permanent interests.” Iti politika awan ti permanente a gagayyem wenno permanente a kabusor, ti pemanente a pagsayaatan laeng. Ta apay ngay?
Awan ngamin ti serserbina dagiti political partiestayo. Imbes nga agbalinda a konkreto nga institusion nga agserbi a pundasion dagiti darepdep, plano ken prinsipio a mamagsayaat ti pagilian, awan met a pulos dagidiay iti pudno a biag.
(Adda tuloyna)
