Panawenen a mapukaw dagiti kolorum a luglugan kadagiti kalsada

Ni Tatang Lakay

 

Kas paset ti agresibo nga addangda a mangpugipog kadagiti kolorum kadagiti kalsada wenno saan nga otorisado nga operasion dagiti public utility vehicle (PUV), impaulog ti   Department of Transportation and Communications (DOTC),  Land Transportation Franchising and Regulatory Board (LTFRB), ken ti Land Transportation Office (LTO) ti Joint Administrative Order (JAO) 2014-01 wenno ti narebisar a multa ken pannusa iti panaglabsing kadagiti linteg, pagannurotan ken regulasion a mangsaklaw kadagiti sasakayan nga agdaldaliasat kadagiti kalsada.

Maysa daytoy nga agresibo nga addang dagiti tallo a pagopisinaan tapno mapukaw dagiti kolorum a lugan nga agdaliasat kadagiti kalsada.

Ditoy Ilocos Sur, agsangsangit dagiti aldaw nga awan ti mapasamak nga aksidente iti kalsada a nakainbolbaran dagiti lugan.

Iti umuna a dua a lawas laengen ti bulan ti Hunio, adun dagiti aksidente a nakainbolbaran dagiti lugan iti probinsia.

Kas maibatay kadagiti panagimbestiga dagiti polis, nabartek dagiti nagmaneho, napakaskas ti lugan, awan silaw  dagiti lugan, awan ti lisensia dagiti nagmaneho, ken dadduma pay a panaglabsing iti pagannurotan ken paglintegan ti transportasion.

Ti makadakes, adu dagiti kolorum a lugan a nainbolbar iti aksidente.

Panawen ngaruden a maipakat dagiti nadagdagsen a multa ken pannusa kadagiti di mangipirpirit kadagiti paglintegan ti transportasion, nangruna dagiti operator dagiti kolorum a luglugan agsipud iti dakkel a perhuisio nga itdenda iti riding public, dagiti biag a marissing ken mapuglay a masakbayan dagiti biktima iti aksidente.

Tapno ipakitada a serioso daytoy a pammilinda, kinuna ni DOTC Secretary Jun Abaya a dakkel ti maipakat a multa kadagiti operators dagiti kolorum a lugan uray iti umuna pay laeng a panaglabsing:  bus – P1million; trucks – P200,000.00; jeepney – P50,000.00; Vans – P200,000; sedans – P120,000.00; ken motorsiklo –  P6,000.00.

Kinuna ni Abaya a prioridadda ti seguridad dagiti agbiahe wenno agdaliasat ket dagiti nabiit pay nga aksidente ti mangipakita a kasapulan ti nadagdagsen a pannusa tapno malapdan dagiti illegal ngs aramid dagiti kolorum a public utility vehicles.

Innayon ni Abaya a kangrunaan a nagbaliwan dagiti naituding a multa ken pannusa kadagiti agsalungasing nga operators dagiti pampubliko a lugan ti pannakaipakat iti maysa a milion a multa uray iti umuna pay laeng a panagsalungasing tapno agpatinggan ti saan a nasayaat nga aramid dagitoy a mamagrisgo iti biag dagiti tattao, nangruna ti riding public.

Malaksid kadagiti multa, ma-impound pay dagiti kolorum a lugan iti saan a nakurkurang ngem tallo a bulan, marebokar ti certificate of public convenience a pakaibilangan dagitoy, ken ti rehistrasion ti lugan, ken mablaklis dagitoy iti pannakaaramatda a public utility vehicle iti masakbayan.

No aglabsing latta ti operator, aminen dagiti CPCs daytoy ket marebokar, ma-blacklist dagitoy a maaramat a PUVs iti masakbayan ken marebokar dagiti rehistrasion. Madiskualipa metten ti operator, ket no korporasion, dagiti stockholders ken director, nga ag-operate iti aniaman a kita ti public land transportation.

Saklawen pay ti pammilin ti panagkitakit nga agipaay serbisio iti publiko wenno mangitulod kadagiti pasahero iti destinasionda, panagsingirda iti sobra, panangyemplo kadagiti darasudos, bastos, wenno arogante a drayber, panagtaray dagiti PUVs nga addaan depektibo a parteda ken aksesoria, panagaramat kadagiti tampered taximeters, trip cutting ken dadduma pay a paglabsingan.

Karaman pay a mapakatan iti multa saan laeng dagiti aglabsing iti prangkisa no di amin a panagsalungasing kadagiti pagannurotan ken paglintegan iti transportasion iti kalsada, kas iti panagliway a mangikabil iti license plates, tampering iti license plates, panangikabil kadagiti saan nga otorisado nga aksesoria a manglapped iti bisibilidad wenno repleksion iti balido a license plate.  Makumpiska pay dagiti saan nga otorisado a license plates ken third plate stickers a pabor iti gobierno.

Adda payen multa dagiti dadduma pay a panaglabsing kas iti panagmaneho nga awanan iti balido a lisensia, napakaskas a panagpataray, saan a panagaramat iti seatbelt, panagmaneho iti saan a nakarehistro a motor vehicle, ken dadduma pay a panagsalunging iti pagannurotan ken paglintegan ti trapiko.

Suportaranmi ti DOST, LTFRB ken LTO iti daytoy nga addangda a mangpugipog kadagiti kalsada kadagiti kolorum a lugan ken managlabsing a drayber.

Mangnamnamakami nga awan koma ti santuen daytoy a paglintegan, saan a magna ti paniero system, ket mapakatan iti pannusa ken multa amin nga aglabsing kadagiti pagannurotan ti transportasion.

Siputantayo ngarud no natangken met la dagiti agtuturay dagiti maseknan nga ahensia a mangipakat iti daytoy a paglintegan tapno malapdan wenno mapabassit ti bilang dagiti biag a maibuis gapu kadagiti kolorum a lugan ken managlabsing a drayber.#