Panawenen ti Paskua, isardengen ti gerra

PAGILIAN dagiti adu a Kristiano ti Pilipinas, ken mabigbig dagiti Pilipino iti naisangsangayan a panangrambak iti panawen ti Paskua kas panangilagip ti pannakaipasngay ti Mesias.

Ayat ken kappia ti espiritu ti Paskua ta naipasngay ni Kristo iti umuna a Paskua ken impaayna ti biagna iti nagkauna a Semana Santa gapu iti mangliwengliweng nga ayatna iti sangalubongan tapno ispalenna iti basol dagiti tattao.

Iti laksid a kappia ken ayat koma ti marikna ken ibiag dagiti Pilipino ita a panawen ti Paskua ta agrurutap dagiti nadagsen a problema iti pagilian kas ti pandemia ti Coronavirus ken dagiti agsasaruno a bagyo ken didigra, ket agtultuloy dagiti mapaspasamak a gerra ken ranget iti nagbaetan dagiti tropa ti gobierno ken dagiti rebelde a komunista, kagiddan pay dagiti mapaspasamak a krimen ken panangriribuk dagiti terorista.

Nakaladladingit dagiti mapaspasamak a panagraranget dagiti tropa ti militar ken polis kontra kadagiti rebelde a komunista. Rinibun a biag ken adun a dara dagiti nagayus kabayatan ti liman a dekada a problema ti insurhensia iti Pilipinas a kapautanen iti intero a lubong.

Nakalkaldaang a pagteng a dagiti agkakadara a Pilipino dagiti agpipinnatay ken agdidinnangran gapu iti pammati ken ideolohia. Iti daytoy maibilangen a kapautan nga insurhensia ket saan laeng nga adu a biag ken dara dagiti napukaw, ngem adun a panawen, gundaway ken pondo ti gobierno dagiti nasayang a nausar koma para iti sapasap a pagsayaatan ti pagilian.

Nagkas-ang dagiti nadara nga enkuentro iti nagbaetan dagti tropa ti Armed Forces of the Philippines kontra dagiti kameng ti New People’s Army ta adda dagiti maisakripisio a biag ti soldado, rebelde ken inosente a sibilian a maipit iti ranget. Nasakit iti tunggal pasmilia ti mapukawan iti ipatpateg gapu laeng iti awan-mamaayna a riribuk.

Nagbalin a kontrobersial ti pannakapapatay iti enkuentro sadiay Surigao del Sur idi Nobienbre 28, 2020 iti nagbaetan ti 3rd Special Forces Battalion ti Philippine Army kontra kadagiti NPA ta napapatay ni Jevilyn Campos Cullamat alias “Ka Rep” nga anak ni Bayan Muna Partylist Representative Eufemia Cullamat. Segun kadagiti militar, NPA medic ti napapatay a Cullamat.

Napasamak ti pannakapapatay ti anak ti Partylist Representative kabayatan ti kabara ti kontrobersia ti “red tagging” dagiti militar kadagiti kongresista iti salinong ti Makabayan bloc pakairamanan ti Bayan Muna. Naakusaran dagiti adda iti Makabayan bloc iti House of Representatives a naikappengda iti legal front ti National Democratic Front ti Communist Party of the Philippines, ken us-usarenda iti saadda ken pondo ti gobierno para ti interesda.

Mangisaysayangkaten iti imbestigasion ti Senate Committee on Defense iti alegasion ti “red tagging” iti panangidaulo ni Senador Panfilo Lacson. Impetteng ni National Securitu Adviser Hermogenes Ebdane ti alegasion dagiti militar.

Iti panagsarita ni Presidente Rodrigo Duterte a naipabuya iti telebision, kinunana kadagiti adda iti makannigid a grupo: “We are not red-tagging you, we are identifying you as communist fronts.”

Kinanunogan ti Presidente ti AFP a dagiti makannigid a grupo ket karaman iti panagkukumplot dagiti lehitimo nga organisasion iti salinong ti NDF.

Mairaman kadagiti innaganan ni Presidente Duterte a kameng ti Makabayan Bloc ket ti Bayan Muna, ACT Teachers Partylist, Gabriela Women’s Party, ken Kabataan Partylist.

Paglikudan met dagiti maak-akusaran dagiti alegasion kontra kadakuada.

Iti umuna a tawen ni Presidente Duterte, nangnamnama dagiti adu a Pilipino a magibusanen ti insurhensia kabayatan ti panagtakemna ta idi Mayor pay laeng sadiay Davao City ket impampanakkelna ti kaasidegna kadagiti lokal a lider-komunista, ken nasinged idi ti relasionda iti sigud a propesorna iti kolehio a ni CPP Founding Chairman Jose Maria Sison. Naideklarar ti ceasefire iti nagbaetan ti gobierno ken NPA, ken nairugi ti peacetalk. Ngem nagangayanna, naisardeng ti saritaan pangkappia ta saan a napatgan dagiti kondision nga inyetnag ti NDF ken adda dagiti panagraut ken panagtambang nga iwayat dagiti rebelde. Naisardeng ti ceasefire ket naituloy ti panagraranget dagiti tropa ti gobierno ken dagiti kameng ti NPA.

Naatap ti pannakagun-od ti kappia ken pannakaigibus ti insurhensia ta aminen a nag-presidente iti Pilipinas manipud iti daydi Presidente Corazon Aquino a nangwayawaya kadagiti nangato a lider ti CPP – NPA – NDF agingga iti agdama nga administrasion. Tunggal administrasion ket nagandat ken nairugi ti pannakagibusen ti insurhensia, ngem napaayda a makagun-od iti mataginayon a kappia.

Kadagiti naglablabas a tawen no tiempo ti Paskua ket maideklarar ti ceasefire iti nagbaetan dagiti tropa ti gobierno ken dagiti rebelde kas pananggun-od ti espiritu iti daytoy a panawen. Ita a tawen, adda pay ngata namnama a magun-od ti apagapaman a kappia? No maaddaan iti apagbiit a kappia iti pagilian, apay a saan laeng koman a mataginayon tapno awanen ti maibuis a biag ken agsayasay a dara? Ania ngata ti pudno a lapped iti pannakataginayon ti kappia?

Uray kaano man, saanto la ketdi a rumukma ti gobierno kadagiti rebelde, ket usarenna amin a bilegna tapno maparmek dagiti kabusor ti estado. No agtultuloy ti kinatibker ti pagtaktakderan ken iruprupir dagiti lider-komunista, narigat a magun-od ti mataginayon a kappia ket agtultuloyto ti pannakaibuis dagiti biag ken panagayus ti dara dagiti agpapada a Pilipino iti ranget nga awan ti mamaayna. Ita a panawen ti Paskua, agkaykaysa koma dagiti Pilipino a mangikararag ti pannakalawag dagiti nakullaapan ti panunotna tapno mariknada ti espiritu ti ayat ken kappia.