Pangpadur-as iti turismo, maigannuat

STO. DOMINGO, Ilocos Sur – Sumagmamano a gannuat ti iwayat ti gobierno munisipal ditoy a pangpadur-as iti turismo iti daytoy nga ili.

Segun ken ni Mayor Amado Tadena, maibilang dagiti gannuat nga irusat ti gobierno munisipal nga idauluanna ti pannakaipasdek ti night market, pannakasilaw ti public plaza ken pannakapasayaat ti Puerto Beach tapno adda pagpallailangan dagiti turista.

Innayon ni Tadena a panggepna a maipasdek dagiti pagtagilakuan ken negosio kadagitoy a destinasion dagiti turista tapno adda pamastrekan dagiti agindeg.#