Panagkalma ken panagridam dagiti umili iti pangta ti terorismo, kiddaw dagiti gov’t officials

VIGAN CITY — Panagtalinaed a kalmado, panagridam ken panagtignay dagiti umili iti sango ti agwarawaras iti social media a Memorandum Alert maipapan iti terror attack kadagiti nagduduma a lugar iti Northern Luzon.

Dayta ti nagkaykaysa nga apila dagiti opisial ti gobierno, militar ken Simbaan kabayatan ti panagwaras iti social media kangrunaanna iti Facebook iti Memorandum Alert a naggapu iti Armed Forces of the Philippines Northern Luzon Command maipanggep iti gandat dagiti terorista a mangisayangkat iti terror attack kadagiti “cluster cities” wenno lugar dagiti negosio, ken dagiti “cluster churches” wenno dagiti napnuan-pakasaritaan a simbaan, kangrunaanna iti Laoag City (Ilocos Norte), Vigan City (Ilocos Sur), Manaoag (Pangasinan) ken Tuguegarao City (Cagayan).

Iti panagsarita ni Governor Ryan Singson iti pannaka-interview kenkuana iti radio, impaganetgetna a kabayatan ti pannaka-verify ti Memo Alert. Inlawlawagna a pudno man wenno saan ti Memo Alert ket nasken a saan a tagtagilag-anen wenno aw-awanen dagiti umili. Impakaammona a kanunonganna ti pannakai-deploy dagiti soldado ken polis kadagiti kangrunaan a pagdudupudopan dagiti tattao pakairamanan dagiti simbaan nangruna iti Vigan City.

Nagapila ni Gov. Singson kadagiti agindeg ken umili iti Ilocos Sur nga agridam ken agalertoda ket ireportda a dagus iti autoridad dagiti makita ken mapaliiwda a baro a rupa ken mapagduduaan ti garawna kadagiti barangay ken lugarda. 

Impasingked ni Gov. Singson a pudno man wenno saan ti Memo Alert, ti Provincial Government ken dagiti maseknan nga ahensia ti gobierno ket ikagumaanda a protektaran dagiti tattao ken pagtalinaedanda a nakappia ti probinsia.

Iti met press statement nga imparuar ni Vigan City Mayor Juan Carlo Medina, impasingkedna ti panangnayonen ti lokal a gobierno kadagiti security measures pakairamanan ti police visibility ken checkpoints kadagiti matatao a lugar iti siudad tapno maalay-ayan ti amak dagiti umili gapu iti social media post. Nagapila pay ti Mayor iti panagridam dagiti umili iti inaldaw a panagbiagda.

Kinompirman ni AFP NOLCOM Spokesman Major Ericson Bulosan a pudno wenno genuine ti Memo Alert a naiturong kadagiti internal intelligence units and operatives, nga un-authorized a nai-leak ken nagwaras iti social media. Inlawlawagna a dagiti impormasion iti Memo Alert ket madama pay laeng ti “validation-na.” Impakaammona a madaman ti imbestigasion iti saan nga autorisado a pannakai-leak ti Memo Alert.

Impatalgedna nga ar-aramiden ti AFP NOLCOM ti kabaelanda tapno mapagtalinaed ti seguridad ken kappia iti Amianan a Luzon. Nagapila iti publiko iti panagtalinaedda a kalmado ken saanda nga agbuteng ken ituloyda dagiti inaldaw nga aramidda. Kiniddawna met ti panangisardengen ti publiko nga i-share ti Memo Alert iti social media tapno saan nga agpataud iti buteng.

Impasingkedna a ti Memo Alert ket awan ti koneksionna iti propaganda a gannuat ngem resulta laeng daytoy ti un-authorized dissemination. Kiniddawna ti panagridam ken panagalerto dagiti tattao ken ipakaammoda iti autoridad dagiti mapaliiwda a mabalin a makaapekto iti seguridad.     

Pinasingkedanen ti Ilocos Sur Police Provincial Office iti liderato ni Senior Supt. Adolfo Rafanan, Provincial Director ken 81st Infantry Battalion ti Philippine Army iti liderato ni Lt. Col. Charles Castillo, Commanding Officer, a nakaalerto ken nakasaganada tapno mapasingkedan ti urnos, kappia ken talna iti probinsia.

Nagapila metten dagiti papadi iti Nueva Segovia iti panangidaulo ni Arsobispo Marlo M. Peralta iti napasnek a panagkararag, panagtalinaed a kalmado ken panagridam dagiti tattao iti sango ti agwarwaras iti social media a Memo Alert.  

Napetsaan ti Memo Alert iti Agosto 2, 2019 a naiturong kadagiti military task forces ken intelligence units iti Northern Luzon maipapan iti panagalertoda iti posible a panagisayangkat iti terror attack dagiti Islamic extremists kangrunaanna kadagiti business centers ken historic churches.

Naipalaon iti Memo Alert dagiti “Crusader Cities” ken “Crusader Churches” wenno lugar a posible a pakaisayagkatan ti terror attack. Naimandar ti pannakapainget ti intelligence monitoring, pannakayetnag ti Red Alert Status inton Agosto 11 – 12, 2019, ken pannakaideklarar ti Laoag City, Vigan City, Manaoag ken Tuguegarao City kas high priority targets. ●