Pannagbat, pammagsol, napasamak iti Sta. Maria

STA. MARIA, Ilocos Sur – Dua a kaso a nakaaramatan ti tadem ti naireport iti provincial police office a napasamak ditoy nga ili itay nabiit.

Iti immuna a report, madama nga agmamadiong da Jona Durat, Jane Bermudez y Jularbal, Edzan Grace Velasco ken Florence Felicitas idi agarup 5:40 ti malem ti Marso 27 idi kellaat nga immasideg ni Alfonso Durat y Manuel, 44, residente iti Barangay Poblacion, sana tinagbat ti lamisaan ngem nairaman ti makannawan a dua a ramay ni Bermudez.

Mapapati a nakainum ti suspek ken makapungtot iti asawana a ni Jona a makimadmadiong.

Kinumpiska dagiti polis ti buneng ni Durat nga agatiddog iti 17.5 a pulgada.

Kabayatanna, dati a susik ti nangbagsolan ni Robert Barbon, 47, naasawaan, residente iti Barangay Nagtupacan, ditoy met laeng nga ili ken ni Albert Racca y Pascua, 21, baro, kalugaranna met laeng.

Naammuan iti inisial nga inbestigasion dagiti polis a bayat ti panagdaliasat ti Honda TMX 155 a tricycle a minaneho ni Racca iti kalsada ti nasao a barangay iti agarup alas 6:00 ti sardam ti Marso 28, mapapati a sinaruno ti suspek sana binagbagsol daytoy iti sumagmamano a daras a nakasugatan ti biktima iti tianna, barukong, kanawan nga ima ken kilikilina ken kanawan a luppona.

Naitaray ni Racca iti Sto. Nino Hospital sa naiyalis iti Candon City Hospital gapu kadagiti sugatna.

Naglibas ni Barbon kalpasan ti pammagsol.#