Footer

Pannaka-regulate small scale mining, naidagadag

ITOGON, Benguet – Sumagmamano a sektor ti nangidagadag iti pannaka-regulate ti small-scale mining industry ditoy iti sanguanan ti pannakatay ti tallo a minero gapu iti  pannakasabidongda iti gas bayat ti panagminasda iti maysa a pribado a pagminasan  iti Loakan Antamok, ditoy nga ili.

Nainaganan dagiti tallo a natay a minero a dagiti agkabsat a   Virgilio Alingcutan, 38, ken Roel Alingcutan, 32, agpada a taga-Mankayan, Benguet, ken ni Roger Rillera, 46, a residente iti  Upper Tram, Itogon, Benguet aken tubo ti Bauang, La Union.

Awan pay dua a bulan sakbayna, 16 a minero ti nakubong iti uneg ti tunnel ti Antamok Goldfield tunnel iti nasurok a makalawas ken nakatayan ti sumagmamano kadakuada.

Iti panagimbestiga dagiti polis, naammuan a simrek dagiti tallo iti tunnel ti pagminasan idi Nobiembre 6, Biernes, ngem saandan a rimmuar a nakaalarmaan dagiti kabagianda ket nangbukelda idi Domingo iti grupo a mangarayat kadakuada.

Narekobre dagiti rescuers ti bangkay dagiti tallo a mangrugin nga agrupsa ket mapapati a nasabidonganda iti gas iti uneg ti tunnel.

Naipan dagiti bangkay iti puneraria tapno maautopsiada sakbay a maiyawidda idinto nga impalgak ti Mines and Geosciences Bureau -Cordillera iti panagimbestigada mainaig iti nasao nga insidente.

Nupay napeggad, agpapaay a pagsapulan dagiti agnaed ditoy ti small scale a panagminas.#